E por ki ar seiñ wa kit mar chi tayaw ya u Conrad wow pynche kiwon ki Weighbridge wa toh hok u krehkaam

Jowai: Ynne ka sngi, ki ar tylli ki seiñ khayi, ka All Jaintia Cements & Clinker Transporters Association waka All Northeast Transports Association da pynman ki yaka yalang wa kyrpang ha Sweet Chilly Hotel, Mynkre ha East Jaintia Hills District kawa em ha thaaiñ Lumshnong.

Ha katai ka yalang da yatai nai sani bha hajrong i chah ktah ki tre truck kiwa challan ya ki mar waphær waphær khamtam ya u khyndaw-bilat wa Clinker na Lumshnong cha kiwi kiwi de ki bynta yong ka jylla mihsngi.

Haka yalang wa pynlai da u CEM warim ka JHADC u Hambertus Nongtdu uwa man leh u President ka All North East Transporters Association da emlang leh u President yong ka All Jaintia Cements and Clinker Transports Association u Balen Thubru.

Hadien ka yaklam heiyatoh wa i dooh nong hajrong kiwa challan mar cha baar jylla, ka yalang da chim ko ya ka rai wow dawa na ka sorkar jylla wow e por ya u Chief Minister u Conrad Sangma hapoh chi tayaw wow e yaka jubab, wei lym kamtæ kiwa challan mar daw hap ki wow lai da kawi won ka liang kawa khaddooh.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Da dawa wa ka sorkar Meghalaya lyngba u Chief Minister toh u pyntikna heiwon wa toh u em ki Weighbridge wei neiyi i daw wa ki District Council da yoh laad ki wow booh ya ki Check Point yong ki deiwa khrong poisa yabor na kiwa yah truck. Da dawa leh wa ka sorkar toh wow booh ko yaki Weighbridge du ha ki bynta wa psiah wa mih ki kari ym toh wow booh tymbood luti deiwa pynbaad wow yoh kamai spah ki Ministers lyngba ki pulit kiwa khrong poisa wei kamjooh ki tre Weighbridge.

“I da rai i wow e dei thoh cha ka sorkar hajrong kani ka rai yong i wei lada ka sorkar ym ap ko, i daw hap i wow thooh ki laad ki luti kiwa khaddooh kawa daw pait i wa daw rem ka sorkar næ i,” da ong u President yong ka All North East Transporters Association.

U President ka All Jaintia Cements and Clinker Transporters Association u Balen Thubru da ong u wa ka sorkar toh u pyntikna wei wow pyntip che wa kiwon ki thaw thaw khia hawa lai i na Lumshnong cha Guawahati wei hawa lai i leh na Lumshnong cha Silchar.

“Em hadooh 3 tylli ki Check Gate ki District Council, kawi ha Mookyndur, kawi ha Mawryngkneng wa kawi ha Umkiang, ki Weighbridge won em ki ha Umtyr-a, ha Ynñiawmer wa ha Umling-Byrni lada mih na Lumshnong cha Guawahati wei lada mih won na Lumshnong kawi ka Weighbridge em ko ha Malidor, Rattacherra.