Ki seiñbhalang wa kynthup ya ka JSM, KSU, FKJGP wa ka HNYF ynne ka sngi da pynman ki ya ka yalang wa jhan ha Ladrymbai hajrong i eh wa ki paidbah wa khayi mooyong yong ka thaaiñ East Jaiñtia Hills District waroh kawi da maad ki neidaw wa boon palat ki munchi baar jylla kiwa wan wow knieh ya ka jakpoh yong kiwa khayi mooyong yong ka thaaiñ deiwa wan thied wei thap mooyong hi pyn da ki hi wei ini i leh yong ki da ktah ko yei kamai kajih yong ki bru ka thaaiñ.
Katkam i ood yong kiwa khayi mooyong, i dor yong u mooyong ha Byrnihat wa Beltola da hiar cha wa palat neidaw wa kini ki munchi da wan hi ki wow thap mooyong na kani ka thaaiñ, iwa da pynman ya kiwa khayi tre jylla wow dooh nong ha ka kamai kajih.
Kamtæ hajrong ini i eh wa kiwa khayi mooyong da maad ki, ki soo seiñ dei sñiawkhia da rai ki wym chah de ya kini ki munchi baar jylla wow thied næ wow thap mooyong na kani ka thaaiñ wei da e por leh ya ki wow mih noh na ka thaaiñ hapoh ka 07-01-22, wei lada chem ya uwon uwon u munchi baar jylla uwa thap mooyong, ki soo seiñ ym yohsa ki wow tuklar wei wow beh noh chi syndon ya ki na kani ka thaaiñ ryngkat wa i pynchitom wa eh.
Ki soo seiñ da maham ki leh ya ki tre jylla wa leh Benami wa yarap ya kini ki munchi wei kamjooh leh ya kiwa jied mooslait wa ki toh u kreh ki deiwa burom akor ym toh deiwa lehkmen, lehsñiawbha, ya muja wa ki baar jylla wei lada chem, ka seiñ daw pynchitom ko deiwa eh ya kini ki bru wa pynhiar dor ya ka jaitbru.
Ki soo seiñ da kyrpaad ki leh ya waroh kiwa khayi mooyong wow ya krehlang wa ka seiñ khnang wow ye u kdoh u khoom ya kini ki bru khwan myntoi samen neibynta wow pynim ya kiwa khayi mooyong tre jylla, pynkut ka kyrwoh na ki soo seiñ.
