U Deputy Commissioner, West Jaiñtia Hills da pynmih hukum u ynne ka sngi yow phah ya waroh kiwa chongdai ha rood sarok wow kyrriah noh ki na ki luti lai kjat ki paidbah nadooh ka 6 tarik uni u bnai.
Ya kani ka hukum da pynmih neidaw wa na i por, cha i por da chem chitom ki bor District wow kyrriah ya kiwa chongdai wa kiwa tyrwa tiar charood sarok ha Jowai kiwa da chim ya waroh ki kdong ki chmiang wa ki luti lai kjat ki paidbah, iwa da pynthut hadooh kattæ kattæ ya ki paidbah wa lai dei kjat kamjooh leh kiwa lai da ki kari.
U DC da ong u wa ini i chongdai ha ki thaw paidbah da man ko pyrchah ya ka aiñ neibhah da chna ya ki luti neibynta ki paidbah wow pynemkaam yow lait nei chah tyrrah kari iwa da jia ma jia i mynsoo neidaw wa joor khynnia ki sarok wei ini i khynnia ym man ko leh iwa bha wa miat khamtam katni wa da ku biang kiwa yoh COVID-19 hapoh ka ri wei da em leh u jait Omicron.
