Jowai: Ka Common Service Centre-Special Purpose Vehicle (CSC-SPV) kawa tip leh kam ka CSC e-Governance Services, da pynman ko ya i e sikai ya kiwa chong chnong ka Nongtalang heiwa kammon u pynemkaam ya ki kor Point of Sale (POS) machine wa ki App lyngba ki Smartphone kiwa ye u su u thied lyngba yong ki.
Ya kani ka e sikai da pynman ha Nongtalang CSC ha kani ka 13 tarik heiwa u Joshua Lyngdoh uwa man u kam u State Anchor-Meghalaya CSC e-Governance Services da batai u cha ki paidbah yei myntoi wa yoh na kini ki kor khamtam wow lait u rah poisa kat cha wa lai.
Da ong u wa katkam i thmu ka sorkar India lyngba ka Digital India toh i wow pynchlur ya ki paidbah wow pynemkaam ya ki Computer lyngba ka Internet ya ki kaam poisa poilaiñ yow pynemkaam ki lyngba ka Internet Banking.
Da ong u leh wa kini ki kor POS toh kiwa da em katni ha waroh ki Bank wei neini cha khmat ka sorkar da mang ko wow booh ya ki ha waroh ki dukan, ki skur, hospital wa kiwi de ki thaw.
Ki kor POS toh ki jait kor kiwa ye u pynemkaam da ki Debit Card/Credit Card yow pynchlur ya ki paidbah wow thap ki ya ka poisa ki cha Bank wei kamjooh leh ya ki tulop hadooh i nongsngi toh u pynpoi bait cha ki Bank Account.
Da batai leh chaphang ki App kam ka Paytm, E-Buddy wa kiwi kiwi wa tip kam ki eWallet kiwa ye u pynemkaam lyngba ki Smartphone kiwa ye u thied kamjooh wow phah poisa.
Ha kani ka sngi da wan wow emlang ha kani ka e sikai da u Secretary Chnong ka Nongtalang u L. Rymbui uwa yaroh chiboon yeiwa leh ka CSC-SPV kawa da ye u wan rah ya kam kani ka e sikai kawa daw yoh myntoi kiwa chong chnong hanlada man ko ka kam ka kaap wa nyngkong ya kiwa chong chnong yow poi lang ki cha ka juk wa katni wei da yooluti u leh wym kut ko du kani chisien donhi.
Discussion about this post