Ki bor pait bor pynlai ka Don Bosco Secondary School, Mookymphad-Mihmyntdu kam chibynta i lehkmen lehburom ya ka 1st Annual Day-Indian Classical Dance 2023 ha ka sngi Hat 2 tarik Thohlakhmi da pynman ki ya ka yalang wa kyrpang heiwa u Terrence Sawian da man u kam u kongsan hei emlang ka Tina Lakiang kam ka symbood kongsan najrong ki Sister, kiwa sikai wa kiwi kiwa chah khut sñiawbha
Kam wow kdar luti ya ki bynta wa chakhmat yong kani ka yalang, ka Sister Maria Joseph da booh ko ki kyntien duwai neitae pynbood ki kyntien pdiang burom na ka Agnes Lapasam katwa kiwi kiwa da klam e mynsien ya ki khynnah kamjooh ya ki bor pynlai ka skur toh u Jonhda, ka Dr. Snigdha, ka Maria Dominica wa ka Sister Sheela Thomas, Headmistress Don Bosco Secondary School, Mihmyntdu.
Ka Tina Lakiang hawa klam da e ko i sñiawngooh wa khroo ya ki Sister kiwa da chim ka yukit wa khia hei wow kyntu kynrong yei puræ puthi yong ki khynnah wei kitbok kitrwiang ko leh wa ha ki sngi ki por wow wan u em chooh chiboon kiwa wan chah sikai ya kani ka rukom chaad wa bna naam ka ri India.
Ya ka e sikai chaphang ka Indian Classical Dance da pait da pynlai da ka Roshni kawa na Bhopal, Madhya Pradesh wei ha ki ar bnai yong kani ka e sikai da pyrchang ko u leh yeiwa bha tam hei wow pynpsiah hei thij i pyrkhat ki khynnah chaphang kammon u tip ki ya ki sarin yong i rukom chaad Kathak wa ka Bharatnatyam.
U Terrence Sawian hawa e yei klam da ong u i sur wei chaad toh i dawai bah ha i ki bru neitæ ong u leh i sur toh iwa ye u ktah yei thij i pyrkhat, i sñiaw wei man i long yong i ki bru kamtæ emkaam bha wow thoohlad kammon u pynpsiah ha ki khynnah ya ka yurim pyrkhat wa miat wa bha lyngba ki sur rwai sur chaad.
Chooh chooh ha kani ka sngi da e kti leh ya ki Certificate cha waroh ki khynnah wa chah sikai neitæ i pynyoo yei rukom chaad Kathak yong ki khynnah kamjooh leh i chaad na ka Roshni wa man ka Instructor yong kani ka Classical Dance Training.
