Ka Geological Survey of India Training Institute (GSITI) da pynman ko yei e sikai wa 3 sngi kawa da sdang nadooh ka 15 tarik hadooh ka 17 tarik uni u bnai neibynta ki dkhot ka Syrwet U Barim Mariang Jingkieng Jri Cooperative Federation Ltd. Kawa man ka seiñ yong chnong kawa da yoh yei yah luti hapoh ka Community-Led Landscape Management Project. Wei kani ka e sikai toh wow pynemkaam yei stat Geological Sciences kamjooh i stat tynre yow pynneh pynsah ya ki yingkieñ jri.
I thong kani ka e sikai toh yow pynyachem yei stat ka juk wa katni wa i stat tynre yong uwa rim wa jah deiwa wanrah lang leh ya ki Scientist (Geologists) wa ki bru chemphang kiwa chong chnong kiwa rah lang ha ki yei stat wa da hiar pateiñ yow ye ki wow pynjanai yei sñiawthooh yong ki kammoon wow leh ya ki kaam pynneh pynsah ym du ya ki yingkieñ jri tangwa wot ki soodong ka chnong ka thaw kam ki thlu um wa kiwi kiwi.
Ha kani ka e sikai da yaklam kammon iwa miat dooh wow e sikai deiwa khlehlang yei sikai wa puræ dei puræ kamjooh deiwa lai thooh bniah cha ki thaw ki bhaw wa emkaam yei pynneh pynsah.
Ha ka sngi nyngkong kani ka e sikai da sdang yei sikai da ki bru ka Geological Survey of India Training Institute, ka Community-Led Landscape Management Project wa kamjooh na ki dkhot ka Syrwet U Barim Mariang Jingkieng Jri Cooperative Federation Ltd. Wei da yaklam hajrong ka Geoheritage, Geotourism, Geotrails wei da pynyoo leh ya kiwa boon ki jait moo kiwa em hapoh Meghalaya.
Ha ka sngi wa ar won da yaklam chaphang iwa ye u ktah ya ki yingkieñ jri wei da lai leh cha ka Geotechnical Laboratory.
Ha ka sngi wa le won daw lai cha ki thaw wa em kini ki yingkieñ jri yow pait dei khmat yow tip iyi wa emkaam u leh.
Neiliang ka Syrwet U Barim Mariang Jingkieng Jri Cooperative Federation Ltd. da pynsñiaw ki yei kmen wow chah jied yow yoh yeini i sikai wei da yooluti wa neini chakhmat daw yoh leh yei sikai ya kiwi de ki chnong wa em ya kini ki yingkieñ jri hapoh Meghalaya.
