Ka Mihmyntdu Community Social Welfare Association (MCSWA) kawi naki seiñ kreh mon sñiawbha wa paw bha hapoh ka Ri-loom Jaiñtia ha kani ka 27 tarik u Duyatra da sdang ko ya ka e sikai mynkna kawa 3 sngi lynter hajrong ka phang “Training on Leadership and Community Development ” deiwa yoh kyrchaan poisa na ka Nehru Yuva Kendra Sangathan Jowai wei ya kani ka e sikai wa le sngi da pynman ha Ialong Lodge heiwa da em hadooh kamwa 40 ngut ki khynroo khyllood kiwa wan cha kani ka e sikai .
Haka sngi sdang da wan wow sakhi da u D. Rapsang uwa man u Deputy Director yong ka NYK Meghalaya I/C District Youth Coordinator Jaiñtia Hills chirup i emlang u Sanatan Das, Regional Officer Youth Employment, u Raja Langstang uwa yoh yei naam Mr. Meghalaya, ki Volunteer ka NYK, ki dkhot ka MCSWA wa kiwi kiwi.
U Rapsang hawa e yei klam ha kani ka sngi da pynsñiaw u yei sñiawngooh ya ka MCSWA wa da ye ko u pynlai bait pynlai ryntih ya kani ka e sikai wei ngait skem u leh wa ha kini ki le sngi ki khynnah u yoh myntoi ki chiboon na ki bru chemphang kiwa wan wow hikai ya ki. Da kyntu u leh ya waroh kiwa chah hikai u man ki kiwa em akor, kiwa ngait sñeiñ ya kiwa pynlai khang wow man ko kawa mih soh. Da khana u leh wa cha kiwi ki District yong ka Meghalaya, ki khynnah khynroo angnood bha ki u chah hikai neibhah e myntoi ko ya ki chiboon ha iwa boon rukom ya ka mynried ka yong ki kam kitæ kiwa yahkhmat wa khroo. Da ban joor u leh heiyatoh i pynemkaam bakla ya ka Mobile wa man hi ko kawa e myntoi tangwa lada bakla khajiak yei won ko leh u yah chei bakla.
Ki bru chemphang kiwa wan wow sikai ha kani ka sngi kynthup ya u Dr. HH Mohrmen uwa da batai hajrong ka phang “Components of Leadership and Communication Skill” wa ka “Community Development through Volunteering Opportunities to the District”.
Ka Merigold Papiah kawa man ka Adolescence Counsellor da batai ko hajrong ka phang “Personality Development and Life Skill”, u Sanatan Das hajrong ka phang “Azadi Ka Amrit Mohotsav”, u Sajeki Passah uwa man u Editor u Wyrta hajrong ka phang “Digital Literacy “.
Da yoh haroh i klam e mynsien na ki khynroo paw khmat ka jylla kam na u Hameshaniah Suiam u khloor yalehke Kickboxing wa na u Raja Langstang ha ka yalang wa pynlai da ka Rinibeth Patlong, ka Program Manager MCSWA .
Ha kini ki le sngi ki khynnah wa chah hikai da yoh bynta ki wow pyndep ya i pynkhooid ya ki bynta ka Ialong Park hadooh ha Madan Lariang chirup waka i lai kjat (Trekking), i pynjra doh hei step, ki yalehke wa boonjait kamjooh ka Bonfire hei janmiet wa kiwi kiwi.
