Changpung: Ka ophis krehkam iong ka District Mission Coordinator, SSA-SEMAM Jaintia Hills District hei iatoh wa i thong iong ka Sansaad Adarsh Gram Yojana (SAGY) ha ka taiaw khatdooh iong u Naikhynde da pynman ko ia ka prokram e sikai kyrpang ia ki nongchongchnong wa em ha Changpung Mission wa ha Changpung Pohshnong.
Ha Changpung Mission da pynman nadooh ka 24 tarik hadooh ka 26 tarik u September 2015 katwa ha Changpung Pohshnong won da pynman nadooh ka 28 tarik hadooh ka 30 tarik u jooh u bnai.
Ha kani ka training wa le sngi ha waroh 2 tylli ki thaw dawan u e i klam wa i batai bniah da ki bru na ka ophis ka SSA Jaintia Hills deiwa emlang u ma H.H. Mohrmen wa ka Dr. J.N. Shullai kiwa man ki bru chemphang ka ri-loom Jaintia hei seindur seindarr ia ka imlang sahlang, ka miat ka bha hapoh i chnong i thaw.
I thong wa hakhmat iong kani ka training toh u e sikai kyrpang ia ki nongchong chnong ha ka liang u kyntu chuh chuh ia ka puræ ka puthi hapoh ka chnong Changpung Pyllun kawa man kawi na ki thain wa chah jied u pynman kaam ka ‘Model Village’ hapoh ka Ri India lyngba u ma Vincent H. Pala, MP.
Ki bynta kiwa da chim u e sikai ha kani ka training toh hajrong ka SSA wa kamon u pynkrehkam ia ka iow ioh myntoi ki khynnah wa em ha pyrdi ka rta 6 hadooh 14 snem kat kaam wa da kdaw ha ka aiñ Right To Education Act 2009, najrong ki bynta wa iatoh wa ka SSA ha kani ka training da em leh kiwi de ki mat kiwa da e batai kiwa kynthup ia ka Community Leadership ka wa da e klam da u ma H.H. Mohrmen.
Ia ka phang i lehkhooid, ka koit ka khiah wa ki bynta i hok ki khynnah wa em ha ka rta 18 snem chapoh da e jingbatai da ka Dr. J.N.Shullai. Hei iatoh wa kani ka training ki bor pynlai iong ka Changpung Mission wa ka Changpung Pohchnong da e ki i iaroh ia ka ophis iong ka DMC, SSA Jaintia Hills kawa chimkhia u pynman ia kam kani ka prokram kawa ye u saindur ia i pyrkhat pyrdain ki nongshongshnong ym duh ha ka puræ puthi hynrei ha kiwi kiwi de ki bynta iong ka imlang sahlang hapoh ka chnong ka thaw waroh kawi.
Discussion about this post