Hajrong ka thong wow yoh ki kynthai khyllood ka chnong ka thaw wa ka ri wa ja jaitbru ya ka mynried wa tyrchaaiñ, ki dkhot ka Rotaract Club of Pine City Shillong ynne ka sngi da hiar ki cha chnong Chyrmang, Thadlaskein Block West Jaiñtia Hills District wow pynman ya ka esikai hajrong ka “Menstrual Health”.
Ha kani ka sngi chwa wow yoh i batai na ki bru chemphang kiwa wan na ka chnat i chait i khiah, katkam ka dustur ka Rotary Club da rwai ya ka National Anthem ka ri wei da pynbood won da ki kyntien pdiang na u Sholin Shylla, Waheh Chnong Chyrmang Wah katwa u Skemjingmut Law, Adviser RAC Pine City Shillong da pachat u ya ki kyntien maitphang hajrong ka seiñ Rotaract Club of Pine City, Shillong.
Ki bru chemphang kynthup ki ya u Dr. S. Nartiang, In-charge Iooksi, PHC, Laskein Block uwa da batai hajrong ka phang ‘Menstrual Health’ katwa ka Jane Rymbai, Adolescence Counsellor Civil Hospital Ialong won hajrong ka phang ‘Teenager Pregnancy’ wei da yoh ya ki kyntien e mynsien ya ki manbei wa ki kynthai khyllood na u C.A. Ram Kyndiah, Secretary RAC of Pine City Shillong.
Chooh chooh ha kani ka sngi da em ka Free Eye Check-up wa da pynkhreh da ka Rotaract Club of Pine City Shillong ryngkat ka Bansara Eye Care wa da mihkhmat da ka Rishai Sutnga, Optometrist Bansara Eye Care wei da saam leh ya ki Sanitary Pad cha ki manbei wa ki khyllood kiwa wan chimbynta ha kani ka sngi.
