Jowai: Ka seiñ Society for Urban & Rural Empowerment (SURE) Jowai, kam chibynta wow yarap ya ki paidbah ka chnong Pynthor, West Jaiñtia Hills District, da esikai ko kammon wow chna sboh (Berkeley Composting) ha ka 23 tarik uni u bnai hei yakrehlang wa ka Northeast Slow Food & Agro biodiversity Society (NESFAS) Shillong.
Chwa wow sdang kani ka esikai da em ka yalang wa pynlai da u Arminius C Lipon Waheh Chnong ka Pynthor wei da yoh ya ki kyntien pdiang burom na ka Deadidakami Mohrmen kawa da batai chaphang i krehkaam ka seiñ.
Da yoh yei esikai na u Marlangki Challam, Agriculture Development Officer Sohmynting Circle, uwa da batai heiwa kammon u chna sboh.
Ki bru wa yoh myntoi na kani ka esikai toh ki SHG na ki chnong kam ka Muphlang, Mustem, Shkenpyrsit wa Pynthor wei da yoh ya ki kyntien khublei na Emonlang Lipon wa man kam u Secretary ka chnong Pynthor.
Ka seiñ da esikai ko leh heiwa kammon wow chna sboh (Berkely Composting) ha ka 21 tarik uni u bnai ha Mukhap, West Jaiñtia Hills, ha kani ka sngi da chah hikai ki dkhot ki SHG na Mukhap wa Mynso.
Ya kani ka yalang da pynlai da ka Daka Bareh, hadien ini da yoh yei klam na ka Pasqualina Lamare kawa da batai ya i rukom krehkaam ka SURE, yeiwa da pynbood da i batai na ka bru chemphang ka Rika Lamare kawa man kam ka Agricultural Development Officer (ADO) kawa da batai kammon wow chna yei sboh 18 sngi wei da pynkut ya kani ka esikai da ki kyntien khublei na ka Somja Phawa.
Discussion about this post