Ka Wahmawleiñ toh kawi na ki chnong wa wa em cha palatsor kawa khooid tam hapoh ka Block Mawkynrew, East Khasi Hills District wa kamjooh hapoh ka jylla waroh kawi.
Kani ka chnong em ko kamwa 50 Km na ka nongbah Shillong wei da bna naam ko leh heiyatoh wa ka dorbar ki khynnah kawa krehkaam bha hapoh kani ka chnong wei da bna naam ko leh ha kiwa boon ki liang.
Ye wow man leh du ha kani ka chnong palatsor wa ki bru wa wanke ye ki u yoh yutip waroh chaphang ka chnong du ha iwi i thaw neibhah waroh ki yutip da em ha ka Signboard kawa da booh chwa wow psiah cha chnong.
Ha ka 23 tarik, ka Society of Urban and Rural Empowerment (SURE) hapoh i yahkhmat u Dr. H.H. Mohrmen da pynman ko ya i e sikai ya ki warep kiwa em hapoh kani ka chnong. Neiliang u Dr. Mohrmen da ong u wa kani toh ka sien wa nyngkong wa ka SURE pynman yalang ko ha East Khasi Hills District wei da sñiawngooh u ya ka yung krehkaam u District Planning Officer, East Khasi Hills kawa da kyrchaan ya kani ka e sikai. Ya kani ka e sikai da pynman lyngba ka Voluntary Action Fund (2016-17) ka yung krehkaam ka DC East Khasi Hills.
Ya ka e sikai da pynman ha skur Wahmawleiñ Unitarian LP School wei ya ka yalang da pynlai da ka Ilasiewdor Gashnga kawa man ka Program Coordinator (Training) yong ka SURE wei da yoh ya ki kyntien pdiang burom na u Rangbah Shnong ka Wahmawleiñ, u Marphred Kshiar.
Ha kani ka sngi ki warep da chah hikai ki ha u Dr. H.H.Mohrmen wa u Habandajop Lyngdoh hajrong i rukom rep wei khamtam kammon u chna sboh.
Kawi won ka e sikai toh kammon wow chna ya ki dawai wa tip kam ka Lacto Acid Bacteria (LAB) wa u Indigenous Micro Organism (IMO).
Da sikai leh kammon wow chna ya ki jait sboh Bokashi deiwa pynemkaam da ki ait ki mrad kiwa psan ki deilang i jhep, ka LAB wa IMO.
Neiliang ka Tyllimon Khongjoh da ong ko wa ka chnong embhah ko wow yoh kam kani ka e sikai neibynta ki warep. Da yoh leh yei jubab yeiwa kylli kiwa chimbynta na u Stanlon Kshiar wa u Rynsong Suting.
