Jowai: 40 ngut ki khynnah khyllood na ki chnong waphær waphær ka West Jaiñtia ynne ka sngi da pdiang ki ya ki Certificate wow pynsakhiat wa da pyndep ki yei esikai wa le bnai ha ka kaam ah sniooh wei wow pynmiat dur.
Ya kani ka esikai da pynman da ka Society for Urban and Rural Empowerment (SURE) ya kawa da kyrchaan poisa da ka Small Industries Development Bank of India (SIDBI), Shillong.
Ha ka yalang wow pynkut ya kani ka e sikai ka B. Ladia kawa man leh kawa e sikai ya kini ki khynnah da kyntu ko ya ki wow pynkrehkaam hok yeiwa da chah hikai ki khnang wow ye ki wow yoh khih yoh kreh. Da pynrap ko leh wa kiwa wan na ki thaaiñ nongkyndong da sdang ki wow yoh kreh deiwa yieñ ki ha ki yong ki dahi ki kjat khlem chaniah de ya kiwi tawon.
Ya ki Certificate da ekti da u Deputy Commissioner ka West Jaiñtia Hills District, u Garod LSN Dykes uwa da kyntu ya ki wym hoi u pynsepai ki ya ini iwa da chha hikai ki.
Neiliang u Rev. H.H.Mohrmen uwa yahkhmat ya ka seiñ da ong u wa ka seiñ daw yarap ko ya kiwa em i thmu wow seiñ khih dei yong ki hi deiwa pyntipmit ya ki cha ki Bank wei kamjooh leh wow pynbiang ya ki kot ki sla wa emkaam ki.
Ha kani ka sngi da yoh leh yei klam naka Pasqualina Lamare kawa man kam ka Program Associate yong ka seiñ.
Discussion about this post