Jowai: Ka Society for Urban and Rural Empowerment (SURE) da pynman ko ya ka esikai ya ki SHG kiwa da kyrchaan da kani ka seiñ ha hall ka Amlarem Community and Rural Development Block, Amlarem.
Ya keni ka esikai da wai da u G.N. Kharlukhi uwa man u District Development Manager ka National Bank of Agriculture and Rural Development, West Jaiñtia hills, Jowai.
U Kharlukhi hawa e i klam da pynchlur u ya ki seiñ wow yarap ki pyn daki yaki hi wei wow lai ki chakhmat ha ki kaam yong ki wei heijooh i por da pynchlur u wow pyn-heh ya i kamai yong ki deiwa chim ya ki ram na ki bank.
Ha kani ka jooh ka sngi da yoh leh yei klam na u Confirm Kamar uwa man u Branch Manager ka Meghalaya Cooperative Bank, Amalrem Branch uwa da kyntu ya ki dkhot wow man ki kiwa tikna ha i e kyllooid mynsien yong ki wei khamtam wow man kiwa syndong khamtam hawa chim ram na ki bank. Da ong u leh wa toh u pyntikna wa ki account yong ki man ki kiwa im neibhah wa ki scheme yarap na ka sorkar katni wan bait ki na ki bank.
Ha kani ka sngi da yoh leh i klam na ka Pasqualina Lamare kawa man ka program associate ka SURE hajrong ka phang wa kammon wow man kiwa yahkhmat ki seiñ, da yoh leh yei klam na ka Lanalangi Lyngdoh kawa man ka Accountant ka SURE heiwa kammon ki seiñ u sdang poisa ki wei da yoh leh yei klam na u Raj Passah katwa ya ka yalang da pynlai da ka D. Mohrmen.
Ha ka Sngi Choh-that wa dadep, ka seiñ da pynman ko ya ka yaaw dai mar rep ha pchem ka H.K.Singh School, Jowai heiwa ki warep wa ki SHG kiwa kyrchaan da ka SURE da wan dai ki ya ki mar yong ki. Ha ka yalang wai ya kani ka yaaw da yoh i klam na u K. Pakma uwa man u president ka SURE, u Sanbor Raliang uwa man u dkhot ka Board yong ka SURE wa u G.N. Kharlukhi uwa man u DDM ka NABARD.
Kani ka yaaw kiwa rep toh kawa da pynchlur da ka NABARD wa ki warep u yoh ki wow dai ya ki mar rep yong ki wei ki sahep na ki bank waphær waphær ha Jowai leh da embynta ki.
Ha ka 5 tarik ka SURE ryngkat wa ka Ryntihlang SHG da pynman ki ya i pynche hajrong ka phang ri sniang wei ya ini da pynman ha ka dorbar hall ka chnong Moodop Nartiang.
U kongsan ha kani ka esikai toh u Daioo Dkhar uwa man u Waheh Chnong ka Moodop, da yoh leh i klam na u Kedimos Dhar wa u Rev. H.H.Mohrmen katwa ya ka yalang da pynlai da u Adressly Pale uwa man u Secretary Chnong Moodop.
Ya ka esikai da e da u Dr. Deimaia Toi na ka Veterinary Department uwa pait ya ka Thadlaskeiñ Block wei ya kani ka esikai da e yarap poisa da u District Planning Officer, West Jaiñtia hills, Jowai.
Discussion about this post