Haka 22 tarik uni u bnai, ka Society of Urban and Rural Empowerment (SURE) deiwa ya krehlang waka North East Slow Food deilang waka Agro-biodiversity Society (NESFAS) da pynman ko yaka Biodiversity Walk Cum Nutrition Campaign neibynta ki khynnah ka chnong Ïooski kawa em ha Laskeñ Block, West Jañtia Hills. Kani man ko leh kam chibynta ka thong krehkaam wa tip kam ka ‘No one shall be left behind initiative’ kawa da kyrchaan da ka REC wei da pynkrehkaam ha ki kattu katni ki chnong ka Meghalaya wa Nagaland.
I thong kani ka ABD Walk Cum Nutrition Campaign toh deiwa lai kjat iwa yahlang wa ki khynnah ka chnong yow tip ki yei mahajon ka rymaw khamtam ki baam wa em ha ki chong ki thaw, ki khloo ki kjam heiwa kini ki baam toh kiwa da e sbun ka rymaw kiwa biang yow yoh yeiwa emkaam i doh i pran yow man kiwa chait wa khiah.
Da em waroh 20 ngut ki khynnah wa da chimbynta deilang wa 5 ngut kiwa lai puræ ka Assam Don Bosco University Guwahati wa na Martin Luther Christian University, Shillong kiwa da lai lang deiwa sdang nadooh ki kpær yung chadooh ka khloo wa em chajan.
Neiliang ka chnong kiwa da ksoh yei stat ki warim, kitæ u waheh chnong u C.P. Tangliang wa u Zion Sutnga da yahluti wei da kdaw da pynyoo ki ya kiwa boon ki jhoor ki soh khloo kamjooh leh ki dawai kynbat.
Ha kani ka sngi da ye wow chem kamjooh wow booh dei thoh ya 21 tylli ki jhoor khloo, 4 tylli ki soh khloo wa 5 jait ki jhoor wa man dawai.
Hadien ini i lai kjat da pynman leh yei chet baam deiwa pynemkaam ya ki 5 tylli ki jait baam wa emkaam wow baam.
U Defender Tyngkan uwa 11 snem i rta da ong u wa na ini i lai kjat da tip u kammon wow baam yaki 5 tylli ki jait baam wa emkaam man-ka-sngi.
U Philapynkmen Sumer da ong u wa emkaam wow pynneh pynsah yaka bei rymaw kawa pynbiang yeiwa emkaam i.
Ya waroh ini da leh cha lait deiwa bood yaki kyndon yada naka khlam.
Chwa wow sdang kani ka lai kjat, ka Daka Bareh Field Coordinator SURE da pynyoo ko ya ki jait baam kiwa 5 jait kiwa ym hoi u dam u em ha ki baam man-ka-sngi, deiwa kylli leh ya kiwa chimbynta wow kynmoo ki lada kini ki jait baam em ki næ ym em ha iwa baam ki haka sngi chwa.
