Ka Khynroo Khyllood Committee Seiñ Raij Jowai deilang ka Jowai Civil Hospital Blood Centre kam chibynta ka dak i leh warom ya ka lyngkhooh snem yap wa 160 u Kiang Nangbah, Khlawait ka Ri Khad-ar Dolloi, ynne ka sngi da pynman ki ya ka Blood Donation Camp Cum Awareness Programme heiwa ki dkhot ka Khynroo Khyllood Committee Seinraij da wan ki wow ya chimbyta.
Ha ka yalang yahkhmat wa tbian hei pynlai u khynroo Rangbahmi Kynjin, Chairman KKC Seiñ Raij Jowai, ka Dr. P. Shylla, District Medical Officer In-charge Jowai Civil Hospital Blood Centre hei klam da yaroh ko ya ki khon khynroo khyllood ka Seiñ Raij kiwa da leh yeini i kaam wa bha tam ha ka yurim wow yarap ya ki para bru wa ban i kjut i chitom wei ong ko leh i em yong kiwa e snam sñiawbha namo ki Voluntary Blood Donors na ki por cha ki por da pynman ya kani ka Blood Centre kawa ye u e i chakri wa bha tam neibynta ki bru wa dawa u yoh yei snaam ha ki por wa jhan.
Chooh chooh da klam khana ko leh chaphang ki bynta wa yatoh wei rukom e snaam wei da kyrsu kyntu ko leh ya kiwi deiwa ong wym toh u tieñ u artatien neibhah i e yei snaam man ko leh ka luti wow wanrah yei chait i khiah wei wow man leh i doh i pran wa chait wa khlan.
U Arwotki Sumer, General Secretary Seinraij Jowai hawa e kyntien, da e mynsien u ya ki khon khynroo khyllood wow pteiñ yeini i kaam na ki snem cha ki snem iwa man kawi na ki bynta yong i sikai niam wow yarap kylliang yachaan kylliang.
Hei pynkut ya kani ka yalang u khynroo Kamnipaia Challam da siang u ki kyntien ngoohblai ngoohsyiem.
![](https://i0.wp.com/wyrta.com/wp-content/uploads/2022/12/ikfhjgk3.jpg?resize=962%2C722&ssl=1)
![](https://i0.wp.com/wyrta.com/wp-content/uploads/2022/12/ikfhjgk1.jpg?resize=962%2C756&ssl=1)
![](https://i0.wp.com/wyrta.com/wp-content/uploads/2022/12/ikfhjgk2.jpg?resize=962%2C724&ssl=1)