Ka Ai Jingim Voluntary Blood Donors Organisation deiwa ya krehlang waka Farm Connect Development Society(FCDS), ynne ka sngi ha Blood Bank Jowai, Civil Hospital kam chibynta wow lehkmen ya ka World Blood Donors Day da pynman ki yaka e snam sñiawbha namo ka Blood Donation Camp.
Ha chwa wow e snam, da em ka yalang wa tbian wa da pynlai da u dkhot ka Ai Jingim Voluntary Blood Donors Organisation heiwa da yoh yei klam na u President yong ka Farm Connect Development Society (FCDS) u Franky Joshua Lyngdoh uwa da ong wa ka Society kawa da yahkhmat u toh ka seiñ kawa kreh neibynta ki warep khamtam ha ki thaaiñ nongkyndong wei da pyntip u leh wa ka seiñ kattæ dang kreh ko ya ki Project kam ka Lakadong Mission wa Bamboo Mission yong ka sorkar.
Ka seiñ jooh yarap ko leh wow pynmih næ wow pynlai yaw ya ki mar rep yong ki deiwa ya krehlang waka sorkar, da pynsñiaw u leh wa ka seiñ sñiawkmen sakhiat u wow yoh ya kani ka laad wow e sñiawbha da i snam wei da yooluti u wa daw man ko iwa kyrkhu ya ki paidbah yong ka District wow yoh ki wow pynemkaam ha iwon iwon i por wa emkaam snam khamtam ha kam kini ki por wa joor ka khlam COVID-19.
Ha i jooh i por da e khublei u leh ya ka Ai Jingim Voluntary Blood Donors Organisation kawa da yahkhmat ya kani ka Blood Donation Camp deiwa e snam khnang wa ka Blood Bank u ye ko wow chakri ya ki paidbah.
Ha kani ka sngi da emlang leh ka In-charge yaka Jowai Blood Bank ka Dr. P. Shylla kawa da khana yei myntoi hawa e snam iwa man leh i kyrkhu yaki paidbah.
