Ka Federation of Khasi Jaiñtia and Garo People (FKJGP) Thadlaskeiñ Block Circle hei yahkhmat yong u Kamni Shylla, Vice President wa u Eddy Son Pariat, Information Secretary da e yarap sñiawbha ki da ki kymmor cha kiwa duna hei doh i pran ka chnong Ummulong.
Ha chwa u e ya kini ki kymmor da em ka yalang wa khian wa pynlai da u Eddy Son Pariat wei da yoh ya i klam na u Ialam Pariat u waheh ka thaaiñ uwa da pynsñiaw yei kmen wa khroo wei da e u ka kitbok kit rwiang yaka seiñ wow nang ye chooh chooh ko u lehbha yaka jaitbru yong i.
Da yoh leh yei klam naka Wanda Lamare ka manbei naka chnong Ummulong kawa da pynsñiaw yei sñiawngooh wa khroo yaka seiñ wa da e ko i yarap ya ki para chnong para thaw, ya ki para doh para snam ki yong i ha kylleiñ ki thaw deiwa pynsñiaw leh yei kmen wa khroo yaka FKJGP kawa jooh yarap bha yaka Ummulong heipor wa chem ka chnong yei eh.
Ha kani ka sngi da ya emlang leh wa u Marhok Marboh u Vice President ka FKJGP Jaiñtia Hills Zone deilang wa ki manbei, ki manpa yong kiwa yoh yarap na ka seiñ.
