Jowai: Ka seiñ Hynniewtrep National People Federation (HNPF), West Jaiñtia Hills District, ynnin ka 22 tarik hapoh i yahkhmat u President yong ka u Newoneborn Suchiang wa ki kattu katni ki dkhot ka seiñ, kam i dak lehkmen Advance Christmas, da lai e sñiawbha ki da u khoo wa ki kymmor cha i thaw ri khonswet yong ka NEIMA kawa em ha chnong Sahsniang, West Jaiñtia Hills.
Ha kani ka sngi neiliang u Suchiang ha chwa wow e ya kini ki e sñiawbha, kam uwa yahkhmat da e u leh yei klam sneiñ kyntu kynpham ya ki khynnah kiwa em ha katai ka thaw ri khonswet, ha i jooh i por da yoh leh i duwai neibynta kitai ki khynnah wa u Blai u kyrkhu kyrdoh wei u yarap u ya ki ha iwa im yong ki wa man-ka-sngi.
Ha kani ka sngi ki dkhot ka HNPF da yoh ki wow yaleh kmenlang wa kitai ki khynnah da ki chaad, ki rwai Christmas wa kiwi de ki yalehke.
