Khliehriat: Ka seiñ Meghalaya People United Front-EJHD, ynne ka sngi da hiar ko cha ka chnong Sonapyrdi wow e yarap sñiawbha cha ki 30 tylli ki manyung yong ka chnong Sonapyrdi da ki kymmor kawa man chibynta ka Christmas.
Ya ini da yahkhmat da u President ka EJHD u Kyrshan Blah ryngkat u General Secretary u Kmenlang Siangshai deilang wa u Vice President u Prakash Shylla wa kiwi ki dkhot.
Ha chwa wow e ya kini ki kymmor cha kiwa chong chnong, da yoh laad leh wow pynman yei yalang wa khian wa da pynlai da u Ning Mynthoi uwa man leh u Ex-Chairman ka chnong Sonapyrdi, da yoh leh yei klam ha kani ka sngi na u Dayapherbha Lamare uwa man leh u Secretary chnong ka Sonapyrdi uwa da e yei yaroh hadooh kattæ kattæ ya ka MPUF deiwa ong leh du kani kawi ka seiñ wa yoo sakhiat u wa wan chakhmat wow e yarap næ wow pait yaki duk ki suk kiwa chem chitom ha iwon iwon i bynta.
Ha kani ka sngi da yoh leh yei klam na u Kyrshan Blah, u Kmenlang Siangshai, da yoh leh yei kyntien khublei na u Tbn. N.K Sutnga uwa da kitbok kit rwiang ya ka seiñ wow yoh ko yei chait nadooh uwa yahkhmat yaka hadooh ki dkhot wei booh u leh yei duwai wa kyrpang neibynta ka seiñ ha kani ka yalang.
