Jowai : Ka NSS Unit yong ka Kiang Nangbah Govt. College Jowai, chirup i yakrehlang wa ka Blood Bank Jowai Civil Hospital, wa ka Meghalaya Aids Control Society, Shillong da e sikai ki hajrong i emkaam wow e sñiawbha yei snaam ynnin ka 27 tarik u Naichiphaw ha Auditorium ka College.
Yei pynche næ e sikai cha ki khynroo khyllood puræ kani ka college kamjooh kiwa man ki dkhot ka NSS Unit da pynche da u Dr. S.S. Nongbri SM&HO incharge Blood Bank Jowai hei emlang ka Dr. P. Shylla M&HO Jowai Blood Bank kiwa kreh ka Blood Bank wa kiwi.
U Dr. Nongbri hei klam yong oo ong u, i snaam toh iwa kordor tam wada e sñiawbha da u Blai neibhah wa ye i u pynim ya chiboon ki mynsien bru wei deibor stat sayan ym ye u chna yei snaam.
Ha waroh ki hospital da em bait ki bru wa emkaam yei snaam, kam ki bru wa chem accident, kiwa duna snaam kamjooh kiwa mih snaam neidaw wa leh ki kjut waphær waphær.
Da ong haroh u, i rta wa ye u e snaam toh 18 hadooh 60 snem pyn kynthai wa chynrang, i khia la kammon kammon toh u em 45 Kg cha neiñ wei emkaam u man kiwa chait wa khiah.
Kamtæ kyntu u ya ki khynroo khyllood wow wan ki chakhmat u e sñiawbha yei snaam neibhah hadien wa e snaam, yarap i u pynchait pynkhlan yow wa e snaam. Ym toh u tieñ u pyrkhat boonjait neibhah ki Doctor chwa u chim snaam leh daw pait daw sylli bniah chwa ki, wei lym yoobiang ki leh ym chim hi ki.
Da pynkut u deiwa ong lada phi e kyrchaan phi ya ka Blood Bank pynyoo wa e mynsien næ e kyrchaan phi ya kiwa ha yung hasem, ki kur ki kha, kamjooh ya ka imlang sahlang, neibhah i snaam wa e sñiawbha phi, ye ko u lai cha kiwa ha yung hasem hadooh cha kiwi tawan ki para bru wym tipmit.
Hadien wa kut i e sikai da em won i ya e snaam sñiawbha wa da chim bynta nadooh ki khynroo khyllood wa puræ kani ka college kamjooh da yoh u sakhi ya uwi na ki wa sikai kani ka College u ma H.Toi uwa da wan chakhmat u e sñiawbha yei snaam yong oo. Waroh kiwa e snaam ha kani ka sngi da em ki kamwa 10 ngut kynthup ya 2 ngut ki kynthai.
Discussion about this post