Jowai: Kam chibynta wow pynyajan wei wow em i ya sñiawyatoh wa i ya krehlang hapyrdi ki pulit wa ki paidbah hapoh ka Amlarem PS, ki pulit ka West Jaiñtia Hills District Executive Force ynne ka 23 tarik da e sñiawbha ki ya 100 tylli ki kymmor cha kiwa wan na ki manyung wa dooh wa duk na ki le chnong wa haap hapoh ka Amlarem Civil Sub-Division, Amlarem PS ka Jarain, Thangbuli wa Shkentalang.
Ya i saam yaki kymmor da pynman ha Jarain Community Hall wei da wan sakhi da kiwa chong chnong, u waheh chnong ka Jarain u K. Sana, u Secretary chnong u S. Pohti, Jarain VDP Secretary u K. Nongrum, Jarain VDP President u M. Pamthied, Thangbuli Secretary chnong u L. Mulad waka Jarain Seng Kynthei Secretary ka S. Pamthied.
Neiliang ki sahep pulit da emlang u D. Moksha, Dy. SP, u A.D. Sangma, OC, Amlarem PS wei da yoh leh yei klam tbian hajrong i bor ka chnong wow pait yaka chongsuk chongsaiñ na u D. Moksha, Dy.SP.
Neiliang ki paidbah wa emlang ha kani ka sngi da yaroh ki yaki pulit ya iwa da leh ki khamtam u Superintendent of Police, West Jaintia Hills ya ini i kaam wa bha wa da sdang u.
Discussion about this post