U Justine Dkhar uwa man kam u MLA warim ka 6-Khliehriat Constituency, ynne da rai u wym yakhun de ya ka Election MLA kawa daw man ha u snem 2023, wei i daw toh wym em da biang i chait i khiah deiwa ong ha i kaam Politics khlem i chait i khiah wa pura ym man iwa ye wow pyndep ya ki kaam ki jaam kiwa boon.
Kamtæ ynne ka sngi u Justine da pynman u ya ka yalang wa kiwa kyrchaan ya oo ha Hotel Eastside Inn, Lad Rymbai Bypass Jalyiah heiwa kiwa boon kiwa kyrchaan yong oo da wan ki cha kani ka yalang, wei i thmu wa hakhmat yong kani ka yalang toh yow pyntip, yow pynche cha kiwa kyrchaan yong oo ya i daw wym yakhun ya ka Election MLA 2023 wei wow e ya ka rai cha kiwa kyrchaan yong oo yeiyi wow e kyrchaan ha kani ka Election MLA wow wan.
Kamtæ ha kani ka yalang kiwa kyrchaan u Justine da ong ki wow e noh yei kyrchaan wa pura ya u Kyrmen Shylla uwa man kam u MLA ka thaaiñ wa katni heijooh i por u Montri ka sorkar jylla.
Hajrong ini, neiliang u Justine da pdiang u ya ini i tyrwa yong kiwa boon wa lang kiwa kyrchaan ya oo wow e yei kyrchaan wa pura ya u Kyrmen Shylla.
U Justine da pynche u wa ym toh wa da psiah u cha ka UDP wei da e u yei kyrchaan ya u Kyrmen kam i rai kiwa boon wa lang. Da ong u leh wa hanla ym yakhun u ya kani ka Election 2023, tangwa ye u wow yakhun ha kiwi won ki Election.
Ha kani ka yalang da yoh leh i klam na u Waheh Chnong ka Wapung, u Deolangki Dkhar, u Waheh Chnong Wapung Shnong, u Kduplang Ryngkhlem, u Waheh Chnong ka Mukhaialong, u Hundred Phawa, u MDC warim, u Helping Phawa wa kiwi de na ki waheh chnong waphær waphær yong ka Constituency.
