Ynne ka sngi, ka All Jaintia Commercial Vehicle Association hei yahkhmat u President Rangbah yong ka u Paila Kordor Lyngkot da yoh ko u lai e yarap da u khoo, ki jhoor, i phñiang wa kiwi kiwi ki marbaam wa emkaam ya kawi ka manyung kawa chem yei eh kawa em ha Riatsasim, Jowai.
Ha chwa wow e ya i yarap da yoh i klam wa kattu katni na u Paila Kordor Lyngkot uwa da ong wa katwon dap dei mynsien wa kmen hawa yoh kam kani ka kabu ksiar wow lai e yarap ya kani ka yung kawa chem yei eh neibhah i kaamram yong ki kam ka Association wym toh du wow pait ya ki kaam kamai kari. I e yarap ya kiwa emkaam ya kiwa chem chitom leh man ko ka kaam kawa hakhmat yong ka Association.
Da ong chooh chooh u wa i kaam e yarap ya kiwa emkaam sakhiat i yarap man ko ka kaam Blai deiwa ong u hanlada man i i e wa khian leh, man hi ko i kyrkhu ya kiwa emkaam. Hawa e mynsien ya ka bei yong ka yung kawa hap wow psa wow pyndap pynbiang ya ki 5 ngut ki khon yong ka samen, najrong wa uwi u khon yong ka uwa dang 5 snem dang kjut u katni neidaw wa haap u najrong yung wa sah ki. U President da ong u hanlada man ko kawa sah kynthai khynnah, kawa chah ieh beiñ ha u kurim ko, ym hoi wow man ko kawa dooh kyrmen, toh u man ko kawa dap kynthai ka wow yieñ kam ka bei ka wow chah yei eh neibhah ki khon.
Ka Association da kyrkhu kyrdoh ko leh ya u khon kani ka kong uwa kjut neidaw wa haap u najrong yung wei kam ka Association booh ko ha i duwai yow smat chait uni u khynnah.
Ka manbei hawa pdiang yei e yarap ka All Jaintia Commercial Vehicle Association, joo ki umkhmat wa kmen deiwa pynyoo ya i kmen wa em kam kani ka Association wa pait ya kiwa dooh wa duk kam ka. Chooh chooh da e ko i kyrkhu kyrdoh ya ka Association yow man ko ka Association kawa dang ku ha ki kaam wa bha yow yoh chooh chooh ki u e yarap ya kiwa emkaam.
