Ki dkhot yong ka EPHATHA Society (ka Society kawa pait kyrpang yaki bru wa em i duna ha ki doh i pran namo ki Differently Abled Person), ynnin ka sngi hapoh i yahkhmat u President Rev. E.S. Sapuh da lai e yarap ki da ki marbaam kam u khoo, u salah, u dai deilang wa ki Mask cha ki 15 tylli ki manyung wa em ha ka chnong Tuber Kmai Chnong, East Jaiñtia Hills District.
Kini ki manyung toh kiwa em yaki khon ki kti wa em i duna hei doh i pran. Da synran lang yaki dkhot yong ka Society da u waheh chnong ka Tuber Kmai Chnong u Jiedlang Sana, u Secretary chnong u Micky Lyngdoh waka Asha ka Samjan Chyrmang.
Neiliang u Secretary yong ka Society u Shaniah Phawa ong u wa kani ka Lockdown da ktah sakhiat ko ya ki manyung wa em yaki khon ki kti kiwa duna hei doh i pran, neibhah wym ye de ki u lai khih lai kreh, wei heijooh i por kam kini ki manyung ym yohlaad ware ki u khih u kreh kam kiwi tawan neidaw wa hap pait hap sumaar ki yaki khon wa em i duna.
Ka Society dei mynsien sñiawlem rai ko deiwi don i yumut wow lai e yarap ya kini ki yung, da ong haroh wa ini i yarap man kam i dak i kyrchaan yaki. Heijooh i poor u booh ki hei duwai wa u Blai u kyrkhu u yeini iwa e ki khnang yow dap u biang ki hei im wa man-ka-sngi.
