Ka Hynñiewtrep Youth Council (HYC) Narpuh Circle ha ka 14 tarik uni u bnai hapoh i yahkhmat u Publicity Secretary u Pyndap Syiemlieh deilang wa u Assistant Secretary u A. Nongrum wa u Finance Secretary u K. Mukhim wa kattu katni ki dkhot da yohlaad ki wow e ya ki kti yarap ha ka chnong Umstaiñ, EJH cha ki 10 tylli ki manyung wa dooh wa duk wa kyrdooh kiwa toh hok wow yoh ya i yarap.
Ka seiñ da lai e yarap ko da u khoo mar 12 kilo wa u salah 3 kilo cha kawi kawi ka yung wei ha katai ka sngi da pynman leh ya ka yalang wa tbian hachwa wow saam ya ki marbaam wei ha katai ka sngi da ya emlang leh u Waheh Chnong u Robi Suchiang wa kattu katni ngut ki dkhot ka chnong.
U Waheh Chnong hawa e yei klam, da pynsñiaw u yei yaroh wei sñiawngooh ya i leh ka seiñ kawa em ya i mynsien sñiawlem ya kiwa chem chitom ha kam ini i por wa wa em hapyrdi i khangsbak hapoh ka jylla deiwa kylli leh wa ha kam ini i por cheiwon wiar ka sorkar, ki MDC, ki MLA tangwa heipor Election won da psiah ki hapoh kawi pa kawi ka thlu yung wow wan ngooh wan dem tangwa ha kam ini i por ym tipmit de ki.
Da pynsñiaw u leh yei sñiawdiaw, tangwa da sñiawkmen u ya ka seiñ HYC hanla man ko i yarap wa khian leh man ko leh i burom ya ka thaaiñ wei khaddooh da booh u yei kitbok yaka seiñ wow nang ku ko chakhmat ha i kaam chakri hapoh ka imlangsahlang.
