Ki dkhot ka Indian Red Cross Society na Shillong wa da yahkhmat da ka Amilia Swer, Vice Chairperson IRCS Meghalaya chirrup ki dkhot ka Meghalaya Scouts-Guides Fellowship, Jaintia Hills wa kynthup ya ka Rethelma Passah, ka Lahiroi Lamare wa ka Gracely Pde ha ka sngi Hat 11 tarik Wisu da hiar ki cha chnong Jalyiah, East Jaiñtia Hills District wow lai yarap da ki kymmor wa ki tiar wa pynemkaam man-ka-sngi kam i sabon, brut lamieñ, dawai lamieñ cha ki manyung wa em kamwa 100 tylli.
Ha kani ka sngi chwa wow e ya ki kymmor wa ki tiar cha ki manyung da em ka yalang wa tbian heiwa ki dkhot ka Indian Red Cross Society, Meghalaya wa kynthup yow Andrew Sawian, General Secretary IRCS Meghalaya wa ka Amilia Swer, Vice-Chairperson IRCS Meghalaya da chim ki ka bynta wow klam u khana chaphang ka Indian Red Cross Society kam kawi na ki seiñ wa kreh wow yarap ya ki bru ha ki dur ki rukom waphær heipor wa em ki rukom tynjooh wym poi pyrkhat ha ka imlang sahlang yong ki bru wa chong chnong.
Neiliang u Waheh Chnong ka Jalyiah da e u i sñiawngooh wa khroo ya ki dkhot ka Indian Red Cross Society, Meghalaya kamjooh ya ki dkhot ka Meghalaya Scouts-Guides Fellowship, Jaiñtia Hills kiwa da chim u leh yei kaam wa bha neibynta ka imlang sahlang yong ki bru wa chong chnong.
Da pynkut ya ka yalang da ki ktien e khublei naka Rithelma Passah.
