Ka seiñ Jaiñtia Student’s Movement (JSM) ynne ka 22 tarik da pteiñ chooh chooh ko wow e yarap cha ki 30 tylli ki manyung ha ka chnong Pamrapaithlu da u khoo, salah wa i blooh cha ki paidbah wa chem chitom wow lai kreh ha kini ki por wa ka sorkar da pynbna ko yei khangsbak.
Ha kani ka sngi da em ka yalang wa tbian wa pynlai da u S. Dkhar, Secretary chnong, heiwa da yoh yei klam na u Ribul Dkhar, General Secretary ka Pamra Unit, u L. Rymbai, Waheh Shnong wa na u Wellson Siangshai, President Eastern Region.
Ka seiñ da kyntu ko ya ki paidbah wa toh u sap ki ya ki Mask wei wow yajngai uwi ya uwi wei wow bood ryntih ya ka hukum yong ka sorkar khnang wow lait nei poor smat u khñiang COVID-19. Chooh chooh da pynkynmoo wa ini toh i sien wa ar wa ka seiñ da lai e yarap ya kiwa emkaam yarap nadooh i sien wa myngkong wa wan ka khlam ha u 2020 kamjooh ha uni u snem 2021.
Chooh chooh neiliang ka seiñ daw thooh ko ya ki laad ki luti wow pteiñ sa cha kiwi ki thaw khamtam cha kiwa dooh wa duk, ong ka kyrwoh na u W. Siangshai, President JSM Eastern Region.
