Ka seiñ Jaiñtia Student’s Movement (JSM) ynne ka 15 tarik da lai e yarap ko da u khoo cha ki 90 tylli ki manyung ha ka Lad Rymbai Dong Datsympeiñ heiwa ki paidbah da chem chitom ki ha kam ini i por wa ka sorkar da pynbna ko yei khangsbak.
Ha kani ka sngi da em ka yalang wa tbian wa pynlai da u Esalan Rymbai, Secretary Lad Rymbai Circle wei da yoh yei klam wa tbian na u Shiningstar Shylla, President Lad Rymbai Circle. Da emlang ki dkhot ka seiñ u Vickey Dann, Finance Secretary, u Sunil Siangshai, u Wanchas Dhar Finance secretary Easter Region wa ki dkhot yong ka chnong Lad Rymbai.
Ka seiñ da kyntu ko ya ki paidbah wa toh u deiñ ki ya ki Mask wei wow yajngai uwi ya uwi wei wow bood ryntih ya ka hukum yong ka sorkar khnang wow lait nei poor smat uni u khñiang khlam COVID-19.
Ka Jaiñtia Students’ Movement (JSM) Barato Zone won, ynne ka sngi da pteiñ ko u saam khoo cha ki 38 tylli ki manyung wa emkaam yarap ha ka thaaiñ.
Ha kani ka sngi da yahkhmat da u General Secretary ka Barato Zone u Slem Pala, u Hengaitmi Sten uwa man kam u Education Secretary ka Barato Zone wa kiwi kiwi.
Neiliang u Slem Pala da ong u wa ha kani ka Zone em chiboon kiwa emkaam yarap wei ka seiñ katwa joh i bor yong ka da yaleh ko wow e yarap ya ki.
Ka seiñ da kyrpaad ko leh ya ki MDC wa MLA ka thaaiñ wow kyrchaan ya kiwa dooh wa duk kam ha ini i por wa em i khangsbak neidaw u COVID-19.
