Ka seiñ JSU Mihmyntdu Unit hapoh i yahkhmat u President yong ka u Generous Suchiang da lai e yarap ki da ki tin sap yung cha kawi ka manyung wa dooh kiwa chong wa sah ha Mihmyntdu. Ka seiñ hadien wa da yoh yutip wa u pa kani ka yung da chem chitom u wow chna pyndep ya ka yung kawa khian du wow yoh rieh slap ryngkat wa 4 ngut ki khon khian wa ka bei.
Neiliang ka seiñ da ye ko wow e yarap katwa joh i bor wa khian deiwa e sñiawbha cha uni u pa ka yung wow nang yoh bor wow kreh pyndep ya ka yung sah yong oo.
Neiliang u Generous da pyntip u leh wa uni u pa ka yung da chna u dei bor yong oo hi samen ya kani ka yung khlem da yoh yarap na kiwi lane deiwa su nong ya kiwi neibhah wa duna poisa heiwa uni u pa da pynlut u yei por hei step wa hei miet manda wan kreh mylla misteri u deiwa chna u suki suki wow pyndep ya kani ka yung sah chwa u slap liur u wan u.
Ka seiñ da kyntu ko leh ya kiwi kiwa em mynsien wow e yarap cha kam kini ki manyung yong ki paradoh parasnam yow ku lang ka jaitbru yong i haka imlang sahlang.
