Ka seiñ Khooid Ya Ka Wah Myntdu chirup i yakrehlang waka Seva Bharati Meghalaya, Jaiñtia Hills ha ka sngi Hat 12 tarik Naiynru da pynman ki i saam ya ki marbaam (Dry Ration) cha 19 ngut ki ASHA ka chnong Jowai kiwa da e i chakri ya ki paidbah ha kam kini ki por wa tynjooh u khniang kjut COVID-19.
Ya ka yalang yong i ekti ya kini ki marbaam da pynman ha Yungwalieh Dorbar Chnong Loomkyrwiang, Jowai hei pynlai u Khroo Lamsalanki Pariat, President ka Khooid Ya Ka Wah Myntdu chirup i sakhilang u Hamewan Laloo, Waheh Chnong Loomkyrwiang, u D. Dkhar, Secretary Seva Bharati Meghalaya, Jaintia Hills, u Oriland Shylla, Treasurer ka Sein Khooid Ya Ka Wah Myntdu wa ki ASHA.
U Khroo Lamsalanki Pariat hawa e kyntien yahkhmat, dap u dei sñiawngooh wa khroo ya ki ASHA heiwa hapyrdi i tynjooh wa hap ki u maad u chem liang wa nang, yieñ dap kynthai ki wow booh yei chakri ya ki paidbah hakhmat, wot hapyrdi i wym yoh ki ya ka bainong næ i su i tda wa tikna na ka sorkar. Chooh chooh pynksan u wow ong ki ASHA toh sakhiat kitæ ki bru kiwa toh hok u yoh yei burom wa khroo na bru ha Blai, heiwa lada pynchongdor yei nong i ni wa e ka sorkar, man i chakri yong ki kam i kreh mon sñiawbha donhi kamtæ ka seiñ Khooid Ya ka Wah Myntdu chirup wa ka Seva Bharati Meghalaya, Jaiñtia Hills dei sñiawkhia ya ki ASHA ha kam ini i por, chim ki wow e yarap da ki marbaam kat wa joh i bor kam wow e bor e mynsien chooh chooh ya ki.
Kiwi ki waheh kiwa da e mynsien ya ki ASHA ha kam ini i por yong i yaleh yei tynjooh u khñiang khlam COVID-19 toh u D. Dkhar, Secretary Seva Bharati Meghalaya, Jaiñtia Hills, u Hamewan Laloo, Waheh Chnong Loomkyrwiang wa u Oriland Shylla, Treasurer ka Khooid Ya Ka Wah Myntdu.
