ka Kner Da Jingieit kawi na ki seiñ yong ki chi lok wa e yarap kawa na Shillong, hapoh i yahkhmat u Pastor TP Kurbah wa u Jesse James L Nongpyuir wa ki paralok, ha ka 28 tarik uni u bnai da wan ki wow e yarap cha ki manyung wa dooh wa em ha dong Syrpoo kawa em ha ka chnong Sutnga da ki kymmor, ki tiar yung wa kiwi kiwi kam chibynta wow lehkmen Christmas yong uni u snem 2021.
Ha kani ka sngi da emlang u Forgive Dkhar, ki kattu katni ki dkhot ka Executive Committee yong ka dong deilang wa ki manyung kiwa pdiang ya ini i e yarap.
Ya kani ka yalang da pynlai da u Rev. TP Kurbah, heiwa da yoh ya i klam pdiang na u Waheh Dong ya ki dkhot ka Kner Da Jingieit wei da yoh leh yei ngooh i dem hachwa wow e ya ki tiar cha kini ki manyung.
Hadien wa da dep wow saam ya kini ki tiar da yoh yei klam na u Jesse James L Nongpyiur wa i klam e khublei neiliang ka dong na u Tbn B. Lamurong wei da pynwai ya ka yalang da ki kyrkhu pynwai.
Neiliang ka dong Syrpoo lyngba u Secretary ka dong u Shan Nongtdu da pynsñiaw ki yei sñiawngooh wa i burom ya kini ki chi lok wa wan noh kyllooid ki hapoh ka dong.
Ka dong ka kitbok kitrwiang ko ya uwi pa uwi u dkhot yong ka Kner Da Jingieit yow nang ye ki wow leh ya kini ki kaam wa bha cha kiwi won ki manyung kiwa emkaam sakhiat yei yarap na i por cha i por.
