Ka KSU Iooksi Unit ynne ka sngi da e yarap ko da u khoo, u dai wa i phñiang baam cha ki 36 tylli ki man yung wa em hapoh ka chnong Iooksi Iapkhla wa Umdienglieng Iooksi B.
Heini i li e yarap yong ki cha kiwa chong chnong da em deilang u Waheh Chnong ka Umdienglieng u Nangaibormi Sutnga, u Stableson Syiem, Secretary chnong, u President ka KSU Iooksi Unit u Sainia Sutnga wa u Secretary ka KSU Iooksi Unit u Kamjuhhi Tangliang.
Ka KSU Iooksi Unit da e yarap ko kamwa 20 yung cha kiwa chong chnong ka Umdienglieng, Iooksi B katwa 16 yung won cha kiwa chong chnong ka Iooksi Iapkhla.
Neiliang u President ka KSU Iooksi Unit u Sainia Sutnga da ong u wa ka KSU ha man ki thaw yong ka Jylla da li e yarap ko cha ki paradoh parasnam neibhah wa sngawthooh ko wa maad sakhiat ki yei eh i khoo ha kam kini ki por wa em ka khlam COVID-19.
Katwa neiliang u Nangaibormi Sutnga waheh chnong ka Umdienglieng Iooksi B, pynsñiaw u i yaroh yaka KSU kawa da chim ya kani ka laad ka luti wow kdar yarap cha kiwa chong chnong wa dooh wa duk.
Da e haroh u i kyrkhu kyrdoh yaka KSU yow nang ye chooh chooh ko u kreh neibynta ka ri wa ka jaitbru.
