Jowai: Ka KSU Mawlai Circle hei kyrchaan lang ki dkhot ka KSU Mawlai Mawiong Umjapung Unit ha ka 17 tarik uni u bnai da lai e yarap ki ya ki ar tylli ki manyung ha Mawali Mawiong Umjapung kiwa chah ktah hei oor khyndaw wei iwi i yung toh yong ka Tiewris Kharjarin kawa jia haka 9 tarik uni u bnai wa iwi won yong ka Emina Jyrwa wa u Edmund Kharnaior iwa jia ha ka 12 tarik uni u bnai.
Ha katai ka sngi da em u dkhot ka seiñ u Anthony Kharkongor uwa man leh kam u Rangbah Shnong ka chnong Mawlai Mawiong Umjapung.
Ha chwa wow e kti yei yarap da em ka yalang wa tbian kawa pynlai da u Antonio Warjri uwa man kam u General Secretary yong ka KSU Mawlai Mawiong Umjapung Unit wei da yoh leh yei klam na u Rangbah Shnong uwa da pynsñiaw yei kmen wa ka seiñ da smat ko wow e yei yarap katwa ye ya kini ki manyung deiwa ong ym toh du ka chnong wow e yarap wei kam ka jaitbru toh u em ka mynsien sniawlem wei da kyntu u leh ya kiwi ki seiñbhalang leh wow smat ki wow e yei yarap.
Khaddooh da yoh yei klam na u Rapborlang Nongrum uwa man kam u General Secretary ka KSU Mawlai Circle uwa da pynsñiaw yei sñiawngooh ya u blai uwa da yada ya ki mynsien wa kordor kini ki ar yung wei heijooh i por leh man ko kawa kjut nood wow yoo yei chah tympra kini ki yung wei ya kini waroh dang ye u chna biang lada man ko kawa chimpor leh toh u man kiwa yaichah wei da kyntu u leh ya ka yungkrehkaam u BDO wow pynsmat ki wow e yei yarap.
Ha chwa wow pynkut ya ka yalang da yoh yei klam sñiawngooh neiliang yong ki ar yung ya ka KSU Mawlai Circle kiwa da kynmoo ya ki kiwa ym em u poi pyrkhat u yoh yarap wei da kitbok kitrwiang ki ya ka seiñ wow dang ku ko ha ki kaam yong ki wei wow chakri ki leh ya kiwa chong chnong ka chnong Mawlai wa ya u paid ka Bri u Ynñiawtrep waroh kawi.
Ini toh katkam wa pyntip u MacDonald Jitem, Publicity Secretary ka KSU Mawlai Circle.
Discussion about this post