Ka seiñ Meghalaya People United Front (MPUF) East Jaiñtia Hills District da lai e yarap ko ynnin ka sngi da ki ben wa ki miej cha kawi ka skur kawa em haka chnong Pamrakmai kawa da tip kam ka Kyntiew Shaphrang LP School.
Ha kani ka sngi da yahkhmat da u General Secretary ka seiñ u Kmenlang Siangshai, u President ka San Chnong Circle, u Juny Phawa wa kiwi ki dkhot ka seiñ wei da emlang leh u waheh chnong ka Pamrakmai, u Iaikiew Rymbai chirup wa u Secretary Chnong, u Wellson Siangshai uwa man leh kam u chongknor ha kani ka yalang.
U Kmenlang hawa klam ha kani ka sngi da ong u wa ka seiñ MPUF yieñ ko neibynta wow pait wow yarap ya iwon iwon i eh i khor wa ka jaitbru emkaam ko ya ka seiñ wei ka seiñ man ko kawa smat wow yarap kat i bor wa ye yong ka wow kyrchaan ya ki manyung wa duna hei yoh i laa hapoh ka jylla wei ka seiñ hi daw tia ko chaphrang wow pyndap yeiwa emkaam ki manyung.
Da kyntu u leh ya ki khynnah skur wow man ki kiwa ngait sneiñ ya kiwa sikai wow minot ki khnang wow ye ki wow wanrah yei naam i burom ya ka skur hadien.
Neiliang u waheh chnong da kitbok kit rwiang u ya ka seiñ khnang wow ye chooh chooh ko wow yarap cha kiwa chem chitom ha ka jylla waroh kawi.
