Jowai: Ki dkhot yong ka Meghalaya People United Front (MPUF), East Jaiñtia Hills District, kamwa jooh leh yaki kaam e yarap na i por cha i por, ynne ka sngi 5 tarik, ki dkhot ka seiñ hapoh i yahkhmat u Kyrshan Blah, President Khliehriat Circle, da lai e sñiawbha ki da ki tin sap yung, cha ki ar tylli ki manyung wa dooh wa duk hapoh ka chnong Moolamanoh, East Jaintia Hills District, kiwa kynthup ya i yung yong ka Jenita Mukhim wa ka Ribha Mukhim, ha kan ka lai e yarap da emlang u waheh chnong ka Moolamanoh u Dras Siangshai, u Scientist Sana, Vice President MPUF Mukhaialang San Chnong, u Thynda Sana, u Wompher Dkhar wa kiwi de ki dkhot ka seiñ kamjooh leh kiwa ha yung hasem yong kitai ki ar tylli ki man yung.
Ynne ka sngi hachwa wow e kti ya ki tin sap yung cha kitai ki ar ngut ki manbei da em ka yalang kawa tbian kawa pynlai da u Wompher Dkhar dkhot MPUF, wei da yoh i klam na u Kyrshan Blah, u wa da kyntu ya ki para seiñbhalang wa ya kiwa yahkhmat chnong khamtam ya kiwa mihkhmat wa toh u pait wei wow thooh laad yarap ya kam kini ki manyung kiwa emkaam sakhiat yaka yarap, neibhah kamwa yoo i katni kini ki manyung wot du ka yung wa ki chong ki sah ki leh ym mande neidaw wa ki tin da pai da jæd lut, kawa ye leh u wanrah yei eh wa ki maa wa i mynsoo yaki.
Neiliang u Thynda Sana, da ong u wa kani ka lai e yarap yong ka seiñ man toh na i daw wym ye u chong te pait yei eh yong kini ki manyung, kamtæ ym yohsa de wow e yarap lang para dkhot wei wow thooh yarap katwa ye i bor yow lai e yarap cha kini ki ar tylli ki manyung, tangwa ki leh man ki kiwa dooh hi.
U waheh chnong u D. Siangshai hawa e yei klam da yaroh u yaka seiñ MPUF, kawa da e yei yarap cha kini ki manyung kiwa emkaam hok wow yoh ka yarap, da ong u leh wa neiliang ka chnong leh daw wan e yarap næ wai laad wai luti ya kam kini ki bru wa dooh neibynta i bha i miat wa ka roi ka paar hi ya waroh ka chnong ka thaw wa ka jiatbru.
Discussion about this post