Khliehriat: Ka Meghalaya People United Front (MPUF) Women’s Wing East Jaiñtia Hills District hei yahkhmat ka Ridaroy Shadap kawa man leh ka President yong ka Women’s Wing hei emlang ka Balarina Shullai kawa man ka Secretary yong ka Women’s Wing, deiwa kyrchaan lang ka seiñbei yong ka MPUF, da lai e yarap ki ya kawi ka beimen kawa da em palat 100 snem.
Ya ini da leh ynnin ka sngi ha i chnong Nonglatem, West Jaiñtia Hills heiwa da e yarap daka song poisa waka that kup cha kani ka men kawa tip pyrtuid kam ka Himamery Nongrum kawa da em la 105 snem i rta.
Ka men Himamery toh kawa em 8 ngut ki khon heiwa 7 ngut da khlaad ki wei da sah sa kawi, katwa ki ksu ko da em ki 90 ngut kiwa dang im suda.
Ha chwa wow e ya itai i yarap cha katai ka beimen da yoh laad leh wow pynman yaka yalang kawa khian kawa pynlai da u Aimons Syad uwa man leh u General Secretary yong ka seiñbei.
Ha kani ka sngi da emlang leh u President yong ka Khliehriat Circle u Kyrshan Blah, u President ka seiñbei u Dapoiwanmi Laloo waki dkhot yong ka seiñ deilang wa ki tre yung yong ka Himamery.
Ha kani ka yalang kiwa da e yei klam toh u Kyrshan Blah, ka Ridaroy Shadap wa u Dapoiwanmi Laloo.
