Ka Meghalaya Veterinary Services Association, Jaintia Hills District Unit (MVSA-JHDU) kam chibynta ka thong wow e yarap ya kitu kiwa duna hei yoh i kot, i chait i khiah hapoh ka jylla. Neiliang ka seiñ deiwa bood ya ki kyndon yada na ka khlam COVID-19 hei yahkhmat u Secretary ka Meghalaya Veterinary Services Association (MVSA-JHDU), u Dr. F.R. Shadap deilang wa ki 4 ngut ki dkhot da lai e yarap ki cha ka thaw ri khonswet ka NEIMA, Orphanage Home wa em ha Sahsniang, West Jaintia Hills District ha ka 17 tarik uni u bnai.
Hawa e ya ki ktien pdiang sñiawbha, u L. Tang, Chairman ka NEIMA, Sahsniang, da pynsñiaw u yei sñiawngooh ya ka MVSA-JHDU wa da jied ki wow yarap ya ka NEIMA. Da khana u leh wa kammon da sdang ya ka NEIMA ha Sahsniang da ka Central Body kawa em ha Shillong ha u snem 2004 neidaw wa em ka kajia pood wa ka Assam iwa da pynman ya kiwa boon ki khynnah wow dooh thaw sah ki.
Da khana u leh wa hadien 2 snem da e kti cha ka Sahsniang Unit. Wei katni waroh ki kaam nadooh wow pynlai skur, i baam, i chait i khiah wa kiwi kiwi da pait da kani ka Unit. Neidaw won wa em ka khlam COVID-19, ka Unit da maad ko yeiwa boon i eh yow ye u pynmih poisa. Kamtæ da sñiawngooh u ya ka MVSA-JHDU wa wan ki chakmat wow e yei yarap ha kam kini ki por wa emkaam wa kyrdooh bha.
Neiliang ka MVSA, u Secretary, Jaintia Hills District Unit da e kti u ya ka Cheque wa T. 13,800 cha ka NEIMA, Orphanage Home, Sahsniang. Da pynsñiaw u leh yei sñiawkmen wow tip ya ki kaam wa bha wa leh kani ka thaw ri khonswet yow yarap ya ki khynnah ki wym yoh thaw sah de.
Da yooluti u leh wa ini i e yarap wa khian ka seiñ daw yarap i wow pyndap neibynta i emkaam ki khynnah.
Ka MVSA-JHDU ha ka 9 tarik uni u bnai da yarap ko leh ya uwi uwa ri sniang wa chitom hei bor khmat uwa tip kam u Kelvin Suting uwa na ka chnong Moosakhia deiwa e yarap 30 tylli ki syiar Layer wa 50 kg i baam syiar.
