Ka Indian Red Cross Society West Jaiñtia Hills Unit ha ka thong wow yarap ya ki para bru lyngba i krehkaam wa da tip kam ka Distribution of Humanitarian Aid kawa man kawi na ki kreh wa da mang neibynta waroh kawi ka ri India. Ha ka 13 tarik uni u bnai ki bor pynlai ka seiñ hapoh ka District da chim ki wow pynman ya i saam ya ki tiar cha ki khynnah skur ka Mookyndur Secondary School, Thadlaskein Block.
Ha ka yalang yong kani ka sngi da pynlai da u D. Pde, Asst. Teacher heiwa da yoh i klam na uwi na kiwa sikai ka skur kamjooh na ki dkhot ka seiñ wa kynthup ya u Hopeful Khongstia, Asst. Secretary IRCS West Jaiñtia Hills Unit wa u Ohiwot Laloo, District Secretary IRCS, West Jaiñtia Hills Unit.
U Hopeful Khongstia hawa klam da pachat u ya ki kyntien pyrkhat hapyrdi ki khynnah heiyatoh wa i man kyrpang kani ka sngi wa tip kam ka World Kindness Day namo ka sngi yong i sbun mynsien neibynta ki para bru katwa u Ohiwot Laloo, Secretary IRCS West Jaiñtia Hills da klam u chaphang ka yurim wa i thmu ka Indian Red Cross Society kam kawi na ki seiñ kreh monsñiawbha wa da sdang da u Henry Dunant wow yarap ya ki chipai ha ki por ka thma bah Soferino.
Chooh chooh da kyntu ya ki khynnah skur wow chim ki ya ka laad ka kabu wow embynta leh ha kani ka seiñ neibhah i chakri wei yarap ya ki para bru ha ki dur ki rukom waphær waphær ha jar jiar i bor wa khian wa heh toh iwa kyrpang wei kyntang hakhmat u bru wa u Blai.
Ki tiar kiwa da saam cha ki khynnah ha kani ka sngi toh ki kymmor, wa ki Personal Hygiene Kits wei ya kam kani ka yalang, ki bor pynlai ka Indian Red Cross Society, West Jaiñtia Hills Unit daw pteiñ ki wow pynman ha kiwi ki skur yong ki chnong waphær waphær wa da jied kyrpang wow yoh ya kani ka kabu næ yarap.
