Ynne ka sngi, ka sieñ RJTA waka JYF ha i yahkhmat u Paila Kordor Lyngkot, President ka RJTA wa u Ombormi L Tariang, President ka JYF da yoh ki wow lai e yarap ya kawi ka yung wa chem yei eh ha Wahiajer kawa em uwi u khon chynrang u wa da jan dap 3 snem tangwa hawa pait yoo kam uwa dang khonboo bait neibhah wa em u hapyrdi i doh i pran wa kjut wa chitom. Kini ki ar seiñ da e ki ya kani ka yung da u khoo wa kiwi kiwi ki marbaam wa emkaam.
Hachwa wow e ya ini i yarap, da em ka yalang wa tbian, heiwa neiliang u President ka RJTA hawa e yei klam da ong u yoo wyrai wow pait hawa em kam kini ki yung wa da maad yei eh, deiwa ong u toh u e ngooh i ya u Blai yow ye u yakhun ya ini i eh waroh deiwa ong ki kaam chakri ya ki para bru toh ki kaam wa chakri i ya u Blai.
Da ong u leh wa ka seiñ na i por cha ki por da pyrchang ko u yarap ya kiwa emkaam sakhiat deiwa ong u leh hanlada man ko i yarap wa khian leh man hi ko i kyrkhu ya kiwa pdiang kamjooh leh ya kiwa e neibhah i e toh ya kiwa emkaam sakhiat ya i yarap. Da kyrkhu kyrdoh u leh ya uni u khonboo wow yoh u dei chait dei nang yow man u leh uwi na ki khlur ka ri waka jaitbru man da heh u mynried mankawi.
U President ka JYF da ong u wa hei pait, da yoo la kam uni khonboo toh uwa dang chi snem, da ong u leh wa ini i e yarap man ko i sdang donhi, heiwa ka seiñ daw thooh ko ki laad ki luti wa daw yarap chooh chooh ya kiwi leh kiwa emkaam yarap ha kini ki por kiwa daw wan.
Ka bei uni u khynnah kawa da sah samen hawa chim ya kini ki e yarap kini ki ar seiñ, da kyrkhu kyrdoh ko wow nang ye ki wow yarap chooh chooh ya kiwi tawon kiwa chem yei eh kam ka.
