Ka seiñ khynroo khyllood ka Seiñraij Wahiajer da e yarap ko ya ki manyung wa kup chiliang, sem chiliang wa em ha ka Seiñraij Wahiajer wei hachwa u poi cha i e sñiawbha da em leh ka yalang wa tbian wa pynlai da u Pyntngenmiki Mulieh, President Khynroo Khyllood Niamtre Wahiajer, da yoh leh ya i klam na u Chot Pale, Chairman Seiñraij Maya Club Wahiajer wa na u Treki Lyngdoh, Secretary Seiñraij Maya Club Wahiajer wa na u Sniawlang Phawa, General Secretary ka Seiñraij Wahiajer.
Neiliang u Treki Lyngdoh da kitbok kitrwiang u ya ka seiñ khynroo khyllood Seiñraij Wahiajer hapoh i yahkhmat u President yong ka wa ha kam ini i por ki khon ka Seiñraij Wahiajer dang em ko boon ki yung wa em hei dooh i duk, ki kup chiliang sem chiliang, sñiawkmen u wa ki khynroo khyllood chynna jngai ki u pait wei chiboon kiwa da dep leh ki man ki kiwa miat wa bha ha ka niam ka rukom haka imlang sahlang.
Neiliang u Chot Pale da ong u wa ki khynroo hi katni man ki ki bru wa chynna jngai wei man ki kiwa sñiawthooh yei eh i khoo ki manyung hapoh ka Raij wei da e u leh ya ki kyntien ya ki manyung wym hoi u yaamrem kitu wym yoh byntalang ha ini i yarap yong ka Seiñ Khynroo Khyllood Seiñraij Wahiajer neidaw wa dang duna ka yarong poisa kamtæ da e yarap chwa du cha kitu kiwa kup chiliang sem chiliang donhi.
Ha chwa u poi cha wakut ka yalang wa tbian, da yoh ya i ngooh i dem na ka Dakmenbha Phawa, General Secretary ka Seiñ Khynroo Khyllood Seiñraij Wahiajer wei hadien ini da poi cha i saam ya ki marbaam.
Ka Seiñ Khynroo Khyllood Seiñraij Wahiajer da e sñiawbha ko da u khoo, dai, salah, phniang, chini, blooh, sla cha, wa ki baam dih cha.
