Khliehriat: Ynne ka sngi ka Synjuk Waheh Chnong Saipung Circle lyngba u Zosiama Thianglai uwa man leh u President yong ka da e yarap poisa ko hadooh T. 17,000 cha ka East Jaiñtia Hills District COVID-19 Relief Fund ha u F.M. Dopth uwa man leh u Deputy Commissioner ka District, kam chibynta i sñiawngooh ya ki bor District kiwa da yarap ya ki bru ka thaaiñ Saipung kiwa wan na kiwi ki District deiwa pynbiang ya ki kari wa kiwi kiwi ki tiar.
Kini kiwa wan na kiwi ki District da chong ki ha ki Qurantine Center kam ha Saipung, Saizol, Thuruk, New Thlangmoi, Saibual wa Tuidam, da pyntip u Oswald B Nampui (President ka JYF Saipung Circle).
Da em palat 40 ngut ki khynnah kiwa da chong Quarantine hadooh ynne ka sngi wei ym em pynyoo dak ki wa em chitom ki wei da kyrmen wa daw kut noh i por wow chongkset ki dei chait dei khiah.
U Oswald da ekhublei u leh ya u DC wa ki wakreh ki bor District kiwa da chakri timun tidiang wei miet wa sngi neibynta ki bru ka thaaiñ.
Chooh chooh da pyntip u leh wa ki seiñbhalang wa ki waheh chnong ka thaaiñ Saipung leh u pteiñ ki wow krehlang wa ka sorkar khamtam ha kini ki por wow yakhun ya ka khlam u COVID-19.
