Ka seiñ kiwa yah thuk-thuk na ka chnong Rymbai, East Jaiñtia Hills ya kawa tip kam ka Riders Tribe Rymbai (RTR), ynnin ka 19 tarik da pynman ko ya ka Charity Ride ya kawa da e pyrtuid ki kam ka #RideForACause deiwa lai e yarap sñiawbha ko ha ka thaw ri khynnah, ka 7-Thyndai Child Care Institution Cum Counselling Centre.
Kani ka thaw toh kawa pynlai da ka Seiñ Kynthai ka Tuber Kmaichnong, East Jaiñtia Hills District.
Ha kani ka sngi da em ka yalang wa tbian wa pynlai da u Marsanky Sympli uwa man u President ka seiñ, da yoh leh i klam pdiangsñiawbha na u Wansalan Thoo (Vice President) da yoh leh ya ki kyntien lamphang hajrong i thmu ka seiñ na u Leonard Dkhar uwa man u Secretary yong ka seiñ.
Da yoh leh ya i klam na ka Tiewmihpli Lyngdoh kawa man ka Chairperson ka Seiñ Kynthai Tuber Kmaichnong wa na u Micky Lyngdoh uwa man u Secretary ka chnong Tuber Kmaichnong kiwa da kitbok kitrwiang ya ka seiñ RTR wow yoh chooh chooh ki ya i mynsien wow e yarap ya kiwa chem chitom.
Ka D. Passah kawa man ka Counsellor ha kani ka thaw da e ko i klam hajrong kammon wow kiar na i dih pynmuaid, wow yada nei chongkha dang khynnah wa kiwi kiwi.
Da pynchongchit ya kani ka sngi da ki chaad na ka dhab chaad na Rymbai ka Rymbai Dancing Crew wa na ki khon khynroo ka Shnong Tuber Wahchnong, kamjooh da yoh leh i rwai na u Rowink Dkhar.
Chwa wow pynkut da yoh ya ki kyntien ekhublei na u Winchester Dkhar uwa man kam u Treasurer ka seiñ.
Ha kani ka sngi, neiliang ka RTR da esñiawbha ko da ki kymmor (Blanket), pangkha (Fan), Emergency Light, u khoo wa kiwi ki mar baam mar dih.
