Jowai: Ka All Jaiñtia Student Union wa ka All Jaintia Student Union Shillong Circle da pynsñiaw ki yei mynsien wa kmen wei i yaroh ya u Ferdinand Suchiang uwa na ri-loom Jaintia wa wanrah naam u ya ka ri waroh kawi kamjooh leh ya ka jylla ha ka kympung yalehke ha Hong Kong.
U Ferdinand da yoh u ya ka takma ksiar ha ka 2nd International Hong Kong Martial Arts Meet 2017.
Ka seiñ da ekhublei wei da kitbok kitrwiang ko ya oo wow ye chooh chooh u wow wanrah yei naam i burom ha ki lympung yalehke wow pynman ha ki por wow wan.
Ka AJSU Shillong Circle leh ha kani ka 23 Naikhynde da pynkupburom ko ya u Ferdinand ha ka sngi kyrpang wa tip kam ka 6th Jaintia Meet 2017.
Ka seiñ da kyntu ko ya kiwa mihkhmat wow kyruiñ khmat cha uni u khynroo wow e yarap ya oo khnang wow ye u wow pynpliah ya i rukom yalehke.
Da kyntu ko leh ya ka sorkar u Dr. Mukul Sangma wow chimkhia wow yarap ya uni u khynroo wei u e yarap cha kiwi tawon ki khynroo ha ki jait yalehke wa ha rukom khnang wow ye ki u wanrah naam wei burom ym du yaki hi tangwa ya ka jylla wa ka ri hi waroh kawi.
Discussion about this post