U National Vice President. ka National People’s Party (NPP), u Prestone Tynsong da ong u wa i em yong ka All India Trinamool Congress ym ktah ko iyi iyi ya ka NPP ha ka jylla Meghalaya. Da ong wa hawa khadooh hap wow chaniah ha ki paidbah wa thap Vote neibhah ki paidbah ki rap stat ki wow jied wow bichaar ya ki Party.
U Prestone da ong u wa ka Trinamool Congress dang mih ko ynnin, katwa ka NPP da kreh chwa ko, wei da pynrap wa hanla ka NPP da yoh ko yei tipmit kam ka National Party, tangwa toh won ka Party kawa na Meghalaya kawa u paidbah ka jylla da tipmit ki hapoh i yahkhmat Montri Rangbah, u Conrad Kongal Sangma.
U Prestone uwa man leh u Symbood Montri Rangbah ka jylla rap nachwa da ong u wa ka lieñ yong ka Congress toh kawa da ngam. Hawa kylli, da ong u wa ki 12 ngut kiwa da mih na ka Congress katni da sah ko sa du 5 ngut ki MLA, wei da ong u wa ki 5 ngut kiwa dang sah leh da bha wow kynthiar noh neibhah wa ka lieñ yong ka Congress da sah sa du i tdong.
Hadien wa chimkti yong u Vincent H Pala kam u President ka Meghalaya Pradesh Congress Committee (MPCC), ka Congress da pyrchang ko wow lum biang ya kiwa yahkhmat warim kiwa da mih naka Party, wei wa u Prestone toh uwi na kiwa yahkhmat wa hakhmat ka Congress uwa da mih noh chwa ka Election 2018 wow yakhun na ka NPP.
Hawa kylli wow lai uiñ biang cha ka Congress, u Prestone da ong u wa da khang ya ka dwar wow lai biang cha ka Congress, wei da e yumut u leh ya kiwi ki MLA wow kynthiar noh na ka lieñ kawa oo da ieh u, “Katni lada nga uiñ biang O daw man O u biej uwa nyngkong dooh.”
