Ka Thadlaskeiñ Turmeric Processing Unit namo ka karkhana wow tylliat ya u chyrmit wa da chna ha u snem 2013-14 hapoh ka Rashtriya Krishi Vikash Yojana (RKVY) Scheme ha i dor wa T. 75 lak daka Meghalaya State Agriculture Marketing Board (MSAMB) hajrong wow kyntu kynrong ya i rep Sy’iñ Chyrmit Lakadong neibynta wow myntoi ki warep. Ynne ka sngi ka sorkar da ekti noh ko ya kani ka thaw cha ka Company samen wa tip kam ka West Jaiñtia Hills Farmers Producer Company Limited wow pynlai ya ka kamwa 5 snem.
Ha kani ka sngi da wan ekti ya kani ka karkhana da u Montri ka chnat rep i riang, u Banteidor Lyngdoh, ryngkat i emlang u GHP Raju, Secretary Agriculture and Farmers Welfare, u D. Sathiyan, Secretary Spice Board Govt of India, u K.N. Kumar Chairman Meghalaya Farmers (Empowerment) Commission, ka T. Sumer (FT) Director of Horticulture, ka K. Swer, Secretary State Agriculture Marketing Board Shillong, ka S.E. Kynjing Assistant Director of Agriculture (FT) West Jaiñtia Hills, ka R.K. Blah District Horticulture Officer, West Jaiñtia Hills Jowai wa kiwi kiwi.
Da ong wa neidaw wa ymye wow pynkrehkaam wei hajrong i thmu wow ye u pynlai rap miat ya kani ka thaw kamtæ ka sorkar ha u snem 2018 da rai ko wow ekti noh ya ka cha ki seiñ ki bru samen.
Da sdang ya ka Mission Lakadong ha u snem 2018 wei ini ym mut i du wow pynyaar ya i rep Sy’iñ Chyrmit na 2577 Hectare cha ka 3652 Hectare wei i pynmih wa na ka 16,00 Metric Ton cha ka 22368 Metric Ton, tangwa wow ye u pyndap yei dawa ya u Chyrmit Lakadong na kylleiñ ki ri ka pyrthai.
Lyngba kani ka kynti ka sorkar daw yarap ko ya ki warep wow sñiawthooh ki yei kordor u chyrmit na kani ka thaaiñ wei emkaam leh wow dai hadien wa da ah ranooid (Slice) næ hadien wa dadep wow tylliat khnang wa ki warep u rap yoh myntoi ki.
U Banteidor Lyngdoh hawa klam ha kani ka sngi da ngait skem u wa kani ka sngi daw wanrah ko ya i kyrmen neibynta ki warep wa lyngba u chyrmit daw ye u chalan wot cha baar ri leh.
“Kam u Montri ka chnat ym hun O du wow chong ha Secretariat næ wow yaklam wa ki sahep tangwa kwah O wow lai pait da nga hi ya ki thaw yong ki warep” da ong u Banteidor.
Da thrang u leh wow pynjan ya i yatoh hapyrdi yong oo wa ki warep wa ki sahep ka chnat neibhah i por da toh i wa kammon wow kyntu kynrong ya i kaam rep.
Chooh chooh da kyntu u ya ki warep wow wan ki chaphrang wow chimbynta ha kiwon kiwon ki esikai wa pynman da ki chnat ka sorkar.
Neiliang u C. Rymbai CEO, ka West Jaiñtia Hills Farmers Producer Company Limited da ong u wa waroh ki warep ye ki wow wan booh ya u sy’iñ, u chyrmit ha kani ka thaw wei da kyntu u ya ki warep wa ymtoh u tieñ de ki wow rep sy’iñ, rep chyrmit neibhah ka sorkar leh daw yarap ko ya ki heiyatoh wa ini i kaam wei kammon wow pynlai yaaw ya u chyrmit.
