Kam chibynta wow pynkhlan ya i chakri yong ka seiñ Jaiñtia Students Union (JSU) ya ki paidbah ka Ri-loom Jaiñtia, ynne ka sngi u MLA ka 2-Jowai Constituency, u Wailadmiki Shylla da ekti u ya ka Ambulance cha ka seiñ ha ka yalang wa pynman ha District Library Auditorium, Jowai.
Ha kani ka sngi da emlang u SP ka West Jaiñtia Hill, u Bikram D Marak, u DSP ka East Jaiñtia Hills, u Jason Mairom, wa u Dolloi ka Elaka Jowai, u Puramon Kynjing uwa da e leh ya ki kyntien ngoohblai ha kani ka sngi, hei emlang ki President wa kiwa kitkaam warim ka seiñ kam u K. War, u Philemon Lyngdoh, u Elanathan Pale, u Rikut Pareiñ wa kiwi kiwi.
Ya kani ka Ambulance da ekti lyngba ka Scheme SRWP namo ka MLA Scheme yong u snem 2020-21.
Hawa e yei klam ha kani ka sngi u Wailadmiki da ong u wa i daw wa da e ya ka seiñ da kani ka Ambulance toh wow ye ko u pynjanai yei chakri yong ka cha ki paidbah ka Ri-loom Jaiñtia neibhah wa man ko ym du kam ka seiñ kawa da rim bha tangwa da man ko leh kam kawi na ki seiñ kawa em ya ki chnat krehkaam ha kylleiñ ka East wa West Jaiñtia Hills.
Da kyntu u leh ya ka seiñ wow sumaar syndong wei wow pynemkaam hok ya ka khnang wow yoh yarap ki paidbah hawa em hapyrdi i kjut i chitom.
