Ynne ka sngi ka Meghalaya AIDS Control Society da pynman ko ya ka Integrated STI, HIV, TB & Hepatitis Campaign ha District Prison & Correctional Home, Jowai heiwa u DC ka West Jaiñtia Hills u BS Sohliya da man u kam u kongsan.
Hachwa wow sdang i sylli ya kiwa chah kset ha kani ka thaw da em ka yalang wa tbian kawa da pynlai da u AM Lanong, Deputy Director (Mainstreaming) na ka MACS.
Ka Dr. B. Decruse, Project Director ka MACS hawa e yei klam da ong ko wa neiliang ka yung krehkaam yong ka chirup wa ka NACO da wan wow leh ya ki Test yong kini ki kjut kiwa poor para bru. Da ong ko wa 60% kiwa yoh ya kini ki kjut ha ka jylla wan ki na East wa West Jaiñtia Hills District.
U BS Sohliya hawa e yei klam da yaroh u ya ka MACS kawa da kreh chitom nadooh ki por nachwa wow yakhun ya ka kjut HIV/AIDS wei khamtam wa da pynman ko ya ki yakob temsur wow pynsñiawthooh paidbah hajrong kani ka HIV.
Da ong u wa em kamwa 16-17 ngut kiwa chah kset ha kani ka thaw kiwa em HIV/AIDS chwa wow chah kset ki wei emkaam wow kreh chitom bha wow lait kani ka kjut u poor.
Heijooh i por da ong u wa kamwa da leh ha East Jaiñtia Hills da sdang wow booddien ya kiwa em ya uni u khñiang kjut wow Test ya kiwi kiwa ha-yung yong ki kawa sariem wa ka Contact Tracing heipor wa em ka khlam COVID-19.
Kiwi kiwa da klam ha kani ka sngi toh u VDS Rymbai, Addl SP. West Jaiñtia Hills District, u U. Kyndiah uwa man u Superintendent, District Jail and Correctional Home, Jowai.
Discussion about this post