Ka Committee for Women Empowerment, wa da thung da ka Assembly da pynsñiaw ko yei sñiawkhia hajrong i ku kiwa dang em ya u khñiang HIV/AIDS hapoh ka jylla Meghalaya, heiwa katkam wa lum yutip da em hadooh kamwa 200 ngut ki bru kiwa khayi yei doh i pran yong ki kiwa em ya u khñiang HIV/AIDS.
Ka Chairperson yong ka Assembly Committee, ka Dr. Mazel Ampareen Lyngdoh da pyntip ko wa katkam i lum yukheiñ wa da yoh, da em palat 5,000 ngut ki bru wa em ya u khñiang HIV/AIDS ha waroh kawi ka jylla Meghalaya. Heiwa da pyntip leh wa katkam ka yukheiñ wa da yoh, le pawa na ki 1000 ngut ki manbei wa punkhon hapoh ka jylla toh kiwa em ya u khñiang HIV.
Ynne ka sngi neiliang ka Committee for Women Empowerment da khut ko leh wow pynche na ki Deputy Commissioners wa ki Superintendent of Police yong ki le tylli ki District, wa kynthup na East Jaiñtia Hills, West Jaiñtia Hills wa ka East Khasi Hills hajrong i ku ki kaam thombor pyrchah ya ki kynthai.
Ka Dr. Amapreen da pynsñiaw ko leh yei sñiawkhia hajrong i ku kiwa punkhon kiwa dang khian rta, kiwa dang khynnah ha West Jaiñtia Hills District. Da pyntip wa katkam i yoh lum yutip da em palat 500 ngut ki khynnah wa dang khian rta kiwa punkhon ha West Jaiñtia Hills tang nadooh u Wisu hadooh katni, deiwa pynrap wa ini pynyoo wa ym man ko iwa bha.
Ka Dr. Ampareen da ong ko leh wa na ki 53 tylli ki mukotduma POCSO hapoh ka District (EJH), 20 tylli toh kiwa dang sahteiñ, 9 tylli da em ki ha ki bynta wa khaddooh yong ka takit wei ha i jooh i por leh da toh wow lai mukotduma noh ya kiwi won kiwa dang sah.
Ha i jooh i por ka Dr. Ampareen da pyntip ko wa ka Committee daw lai hiar ko cha East Jaiñtia Hills ha ka 21, 22 wa 23 tarik uni u bnai, yow chem wei wow tip hadooh katwon ki mukotduma kiwa da lai chakhmat wei wow tip leh kammon da leh yow wanrah biang yei chngaaiñ ha ka thaaiñ.
