U Chief Electoral Officer (CEO) ka jylla, u Federick R Kharkongor da ong u wa ya ka Model Code of Conduct (MCC) u pynkrehkaam deiwa rkhiñ bha, wei katkam ka kyndon yong ka Election Commission of India, ka MCC u krehkaam ko chisyndon nadooh myntu ka 18 tarik hadien wa da dep u pynbna ya ka tarik Election.
Hawa batai bniah yei pynkrehkaam ya ka Model Code, u CEO da ong u wa hap pyndam noh ya waroh i thoh kiwa yatoh wa i em yong ka sorkar hapoh 24 kynta hadien wa da pynbna ya ka Election, da khang leh ya ki kyrtong wow lai yalap Election deiwa pynemkaam ya ki kari sorkar wei wow pynlut da ka poisa sorkar wow booh Advertisement.
Hawa yatoh wa ki kaam pynroi, da khana u wa ym ye wow sdang thymme ya kiwon kiwon ki kaam pynroi hadien wa da krehkaam ka Model Code of Conduct, lait noh du kitu ki kaam kiwa da sdang chwa daw ye u pynlai yei kreh.
Hawa yatoh wa i pynkhreh ya ki bor wa sonteri, u CEO da da khana u wa ka jylla da yoh ko 120 Company ki bor pulit, wei katni 40 Company da em ki ha ka jylla. Da ong u wa em 3 thup kiwa pait ha ka Election wa kynthup ya kiwa pait yei pynlut pynsep deilang wa ki pulit.
U Kharkongor da khana u wa em hadooh 34 tylli ki Constituency ya kiwa tip kam ki ‘Expenditure Sensitive Constituencies’ kiwa joor bha ka pynemkaam poisa ya kiwa daw hap pait bha ha kylleiñ ka jylla. Hawa yatoh wa i pynemkaam poisa da ki kyrtong, da khana u wa da e laad ya waroh ki kyrtong wow pynlut ki hadooh T. 28 lak samen ha kani ka Election.
U CEO da pyntip u leh wa ki Polling Station kiwa ye u mih i awri awra da em ki 747 tylli, katwa kiwa ye u mih rap joor i kulmar da em ki 399 tylli hadooh katni, wei da pynrap leh wa ini i em kam kini ki Polling Station ye leh wow kylla katwa dang jan ka Election.
Ha iwi i liang u Kharkongor da khana u wa da em hadooh 21,61,129 ngut kiwa thap Vote ha waroh ka jylla, wei i em kiwa thap Vote da ku da 18% kawa man 4,29,062 ngut bar ya ka Election wa da dep. Da khana chooh chooh wa ki Polling Station waroh ha kani ka Election da em ki 3482 tylli deiwa pynmih thymme 147 tylli.
