U Montri ka chnat Forest & Environment ka jylla, u James Sangma hapoh ka yung dorbar chna-aiñ ynne ka sngi da pyntip u wa ka sorkar ym em chim ko yei rai wow thung dieñ Satlai namo ka Oil Palm Cultivation hapoh ka jylla wei ka chnat ym pu em leh ko yei takit hajrong ini wei ka sorkar jylla leh dang yang ko ya ki kyndon hajrong ini i kaam iwa daw pynmih da ka sorkar India.
Hawa kylli ya ini, u MLA ka Shillong West, u Mohendro Rapsang da kylli pynrap u wa lada ka sorkar booddien ko namo ym em ya ki Company ki bru samen ki wow thung ya kini ki dieñ hapoh ka jylla. Heiwa u James da ong u wa ya ini i kaam wow pynkreh toh da ka chnat Agriculture.
Tangwa u Rapsang da ong u wa ini ym toh i rep wa khian deiwa emkaam da ki spah Hectare i thaw wei ym yoh thaw hadooh kat deini lada ym pynemkaam da ki thaw wa man khloo wa em hapoh ka jylla.
U James da jubab u wa ka aiñ Forest Conservation Act da klam che bha ko wa lada pynkylla ya iwon iwon i khloo yow pynemkaam cha kiwon won ki jait, emkaam wow yoh bor na ka Ministry of Forest & Environment & Climate Change wei lada jia wa emkaam wow pynemkaam da ki khloo, da em ki kyndon wa hap wow bood.
U Rapsang da pynbood u deiwa kylli wa lada jia wa daw hap wow pynemkaam da ki khloo, ka sorkar daw yieñ ko wow ong wa ym chah wow leh yeini yow yada yei spah wa rymaw?
U James da pynche u wa em boon ki thaw wa sah chrah ha Meghalaya iwa da em hadooh 3,90,000 Hectare kiwa ym em pynemkaam tangwa ka sorkar ym pu em chim ko ya iwon iwon i rai hajrong ini.
U Montri Rangbah ka jylla, u Conrad Sangma leh da chimbynta u ha i yatai hadien wa kylli kammon da yaklam ha ka yalang ka sorkar pyrdi hajrong ini i kaam heiwa da khana u wa da em ki jylla kam ka Arunachal Pradesh wa em da kiwa boon lak Hectare ki thaw wa khlem pynemkaam wei da kwah ki wow thung ya kini ki dieñ ha kini ki thaw wei ka jylla Mizoram leh da pynyoo ko yei em i kwah wow thung ya kini i dieñ katwa ha iwi won i liang da em kiwi ki jylla kam ka Meghalaya kiwa da ong wa kwah ki wow pait bniah chwa wow chim ya ka rai lada daw pynyoh myntoi ko ya ki paidbah kam hei yoh khih yoh khan tangwa boi heijooh i por won da ktah i ya ka rymaw kamtæ da hap wow pyrkhat sani bha ya ini.
